ގޯތިގެދޮރުގެ ތަނަވަސްކަން ހޯދުމުގެ ފުރުސަތު ހުރިހާ ރައްޔިތުންނަށް ފަހިކޮށްދިނުމުގެ ގޮތުން ވަކި ކެޓަގަރީއެއްގެ ގޮތުގައި ތިމާގެ އަނބިމީހާ ނުވަތަ ފިރިމީހާގެ ބޯހިޔާވަހިކަމެއް އޮތްނަމަވެސް ގޯއްޗަށް އެދި ކުރިމަތިލެވޭނެ ގޮތަށް ވަރަށް އަވަހަށް ހުޅުވާލާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
ރައީސް މިގޮތަށް ވިދާޅުވީ ރައްޔިތުންގެ މަޖިލީސް މިދައުރަށް އިފުތިތާހުކޮށްދެއްވައި 2026 ވަނަ އަހަރުގެ ރިޔާސީ ބަޔާން އިއްވަވަމުންނެވެ.
ބޯހިޔާވަހިކަން އެންމެނަށް ސިޔާސަތުގެ ދަށުން އިތުރު 2 ކެޓަގަރީއެއް އިތުރުކުރުމަށް ވަނީ ހަމަޖެހިފައެވެ. ކުރީ ސަރުކާރުގެ ބިންވެރިޔާ ސްކީމުން ޖޮއިންޓްކޮށް ގޯތި ލިބިފައިވާ މީހުންގެ ތެރެއިން ވަކިން ގޯތި ހޯދަން ބޭނުންވެ ކުރިން ލިބިފައިވާ ގޯތި ދޫކޮށްލަން އެއްބަސްވާ ފަރާތްތަކަށް ޚާއްސަ ކެޓަގަރީއެއް ހުޅުވާލުމަށްވެސް ވަނީ ނިންމާފައެވެ.
ރައްޔިތުންގެ ކަންބޮޑުވުމާއި އެއްގޮތަށް ކުރިންވެސް ސަރުކާރުން ވަނީ ބައެއް ކެޓަގަރީތަކަށް ބަދަލުގެނެސްފައެވެ. މިގޮތުން 1 ކޮޓަރި ނުވަތަ 2 ކޮޓަރި ލިބިފައިވާ މީހުންނަށް ޚާއްސަ އުސޫލެއްގެ ދަށުން މިސަރުކާރުގެ ބޯހިޔާވަހިކަމުގެ ސްކީމަށް ކުރިމަތިލެވޭގޮތަށް ވެސް ވަނީ އުސޫލަށް ބަދަލުގެނެސްފައެވެ.
މިސަރުކާރުގެ ބޯހިޔާވަހިކަމުގެ ސްކީމުގެ ދަށުން ގޯއްޗަށް އެދި ހުށަހެޅުމަށް ފުރުސަތު ހުޅުވާލާފައިވަނީ އަންނަ މާރިޗް މަހުގެ 4 ވަނަ ދުވަހުގެ ނިޔަލަށެވެ. އަދި ފްލެޓަށް އެދި ހުށަހެޅޭނީ އަންނަ އޭޕްރީލްމަހުގެ 17 ވަނަ ދުވަހުގެ ނިޔަލަށެވެ.
