އަނެއްކާވެސް މިއީ ހޫނުގަދަ ދުވަސްވަރެކެވެ. ފިނިމޫސުމާއި ބަލާއިރު ހޫނު މޫސުމުގައި ކަރަންޓު ބޭނުންކުރާވަރު ގިނަވެއެވެ. ބައެއް ގޭގޭގެ ކަރަންޓު ބިލަށް އެތައްހާސް ރުފިޔާއެއް މަހެއްގެމައްޗަށް ދައްކަން ޖެހުމަކީ އެ ގޭގޭގައި އުޅޭ މީހުންގެ ކަންބޮޑުވުމެކެވެ. ތިރީގައި މިވަނީ ކަރަންޓު ބިލު ކުޑަކުރުމަށް ކުރެވިދާނެ ކަންތައްތަކެވެ.
ގޭގައި ބޭނުންކުރަނީ ކޮންކަހަލަ ލައިޓެއް؟
އެނަރޖީ ސޭވިންގ ލައިޓް ހަރުކުރުމަށް އިސްކަން ދޭށެވެ. އެއިރުން އާދައިގެ ލައިޓް އަށްވުރެ ޚަރަދު ކުޑަވާނެއެވެ.
ބޮކި ދިއްލަނީ ކޮންމެހެން ދިއްލަން ޖެހިގެންތަ؟
ބައެއް ގޭގެއަށް ދުވާލު ގަޑީގައި ބޮކީގެ އަލި ބޭނުން ނުވެއެވެ. ދޮރު ފޮތިތައް ކަހާލުމުން ބޭނުންވާވަރަށް އަލި ލިބެއެވެ. އެހެންނަމަވެސް ފަސޭހައަކަށް ބޮކި ދިއްލާލެވޭ ފަހަރު އާދެއެވެ. ލައިޓްގެ ބޭނުން ނިމުމުން އަވަހަށް ނިއްވާލުމަށް ހަނދާން ކުރާށެވެ.
ކޮމްޕިއުޓަރ ޑީކޯޑަރ ފަދަ ތަކެތި ނިއްވާލަންތަ؟
ގޭގައި ބޭނުންކުރާ މިފަދަ ތަކެއްޗަކީ އަބަދުވެސް 'އޮން' ކޮށްފަ ހުންނަ ތަކެތީގެ ގޮތުގައި ފާހަގަކުރެވެއެވެ. ބޭނުންކޮށް ނިމުމުން ކޮމްޕިއުޓަރ ފަދަ ތަކެތި ނިއްވާލެވިދާނެއެވެ. އެއިރުން އެއަށްދާ ކަރަންޓުގެ ޚަރަދު ވެސް ކުޑަވާނެއެވެ.
އެއްޗެހި ދޮވުމުގައި ސަމާލުވުން
ދޮންނަ މެޝިނުގެ ސަބަބުން ގޭގެ ކަރަންޓު ބިލުގެ 14 އިންސައްތަ ބޮޑުވެއެވެ. އަވަސްއަވަހަށް މަދު އަދަދެއްގެ ހެނދުން ދޮވުމުގެ ބަދަލުގައި ވަކި ގޮތަކަށް ބަހާލައިގެން ޚަރަދު ކުޑަވާނެ ގޮތަކަށް ދޮވެވިދާނެއެވެ. އަދި ކޮންމެ ފަހަރަކު ހޫނުފެނުން ދޮވުމުގެ ބަދަލުގައި އާދައިގެ ފެނުން ދޮވެވިދާނެއެވެ.
ކަރަންޓު ޚަރަދު ކުޑަ އޭސީ ބޭނުންކުރުން
ހޫނު މޫސުމުގައި ގިނައިން ބޭނުންކުރާ އެއްޗަކީ އޭސީއެވެ. އިންވާޓާ ބްރޭންޑްގެ އޭސީ ބޭނުންކުރެވިދާނެއެވެ. އެއިރުން އާދައިގެ އޭސީ އަށްވުރެ ޚަރަދު ކުޑަވާނެއެވެ.
ބޭނުންނުކުރާ ސްވިޗްތައް ނިއްވާފަ ބެހެއްޓުން
ގޭގައި ވަރަށް ގިނަ ސްވިޗްތައް ހުންނައިރު ލެޕްޓޮޕް ފޯން ފަދަ ތަފާތު ތަކެތި ޗާޖުކޮށް ނިމުމުން ސްވިޗް ނިއްވާފަ ބެހެއްޓުމަށް ސަމާލުކަން ދޭށެވެ. ބޭކާރު ގޮތުގައި ގޭގެ އެއްވެސް ސްވިޗެއް އޮންކޮށްފަ ނުބެހެއްޓުމަކީ ވަރަށް މުހިންމު ކަމެކެވެ.
ނިމިދިޔަ މަހުގެ ކަރަންޓު ބިލަށް ބެލުމަށްފަހު ޚަރަދު ކުޑަކުރަން މަސައްކަތް ކުރުން
ކަރަންޓު ބިލް ކުޑަކޮށްގެންވެސް ފައިސާ ރައްކާކުރެވިދާނެއެވެ. ހިތްވަރާއެކު މަސައްކަތްކޮށްގެން ބިލް ކުޑަ ނުކުރެވިއްޖެނަމަ ޚިދުމަތް ހޯދާ ފަރާތަށް ގުޅައިގެން ވާގޮތެއް ބަލާލެވިދާނެއެވެ. އެއީ ބައެއް ފަހަރަށް ގޭގައި ހަރުކޮށްފަ ހުންނަ މޯޓަރު ފަދަ އެއްޗަކުން ލީކުވެ އަބަދު މޯޓަރު ޖެހޭނަމަ ބިލު ބޮޑުވުމަކީ ވެދާނެކަމެކެވެ. މިފަދަ މައްސަލައެއްވެސް އުޅޭކަން އެނގޭނީ ދާއިރާގެ ތަޖުރިބާހުރި މީހެއްގެ އެހީތެރިކަން ހޯދައިގެންނެވެ.
