އެއްމަސް ދުވަހުގެ ދިގު ޗުއްޓީއަކަށްފަހު އަންނަ ހަފްތާގައި ސްކޫލުތަކުގެ ކިޔެވުން ފެށެނީއެވެ. ދިގު ޗުއްޓީއަކަށްފަހު ދަރިވަރުންނަށް އަނެއްކާވެސް ބުރަ ދުވަސްތަކާއި ކުރިމަތިލާންޖެހޭއިރު އެ ޅަސިކުނޑިތައް އެކަމަށް ތައްޔާރުކުރާނީ ކިހިނެއްހެއްޔެވެ؟ 5 ގަޑިއިރާއި 7 ގަޑިއިރު ސްކޫލުގައި ހޭދަކުރާ ދަރިވަރުން އުޅޭއިރު ދުރާލާ ވިސްނަންވީ ކަންތައްތައް ތިރީގައި މިވަނީއެވެ.
ދުރާލާ ކަންކަން އިންތިޒާމުކުރުން
އެކަޑެމިކް ކަލަންޑަރު ވަނީ ނެރެފައެވެ. އެހެންވުމުން ސްކޫލު ބަންދުވާނެ ދުވަސްވަރާއި އިމްތިހާނު އޮންނަ ދުވަސްވަރާއި އެނޫންވެސް މުހިންމު ދުވަސްތައް ދުރާލާ އެނގެން ހުރެއެވެ. އެއްފަހަރާ މާބޮޑަށް ބިޒީ ނުވާނެ ގޮތަކަށް ދުރާލާ ކަންކަން ރޭވިދާނެއެވެ. "ގޫގުލް ކަލަންޑަރ" އެއް ބޭނުންކޮށްގެން މުހިންމު ދުވަސްތައް އެނގޭނެ ގޮތެއް ހެދިދާނެއެވެ.
ލިބެންހުރި ރިސޯސަސް ބޭނުންކުރުން
ދަރިވަރުން ތަޢުލީމު ހާސިލުކުރަމުންދާއިރު އެކުދިންނަށް ބޭނުންވާ ސޮފްޓްވެއާ އަދި އިތުރު ފޮތްތައްވެސް ހަމަކޮށް ދުރާލާ ތައްޔާރުވެވިދާނެއެވެ. އެއިރުން ސްކޫލު ފެށޭ ދުވަސްކޮޅު ކުއްލިއަކަށް އެކުދިންނަށް ބުރަބޮޑުނުވެ ހަމަޖެހިލައިގެން ކަންކަން ކުރަން ފަސޭހަވާނެއެވެ.
ޓައިމްޓޭބަލް ތައްޔާރުކުރުން
ގިނަ ދުވަސްތަކަކަށް ޗުއްޓީގައި އުޅުމުން އެކުދިން އާދަވެފައި ތިބޭނީ ޗުއްޓީ ދުވަސްވަރު އިސްކަންދިން ކަންތައްތަކަށެވެ. އެހެންވުމުން ގޭގައި ކިޔެވުން ކުރިއަށްގެންދާނެ ގޮތުގެ ޓައިމްޓޭބަލް ވަރަށް މުހިންމެވެ. އެ ޓައިމްޓޭބަލް ހަދަންވާނީ ކިޔެވުމުގެ އިތުރަށް އެކުދިން ބޭނުންވާ އެހެނިހެން ކަންކަންވެސް ކުރެވޭނެ ގޮތަކަށެވެ. ކުޅިވަރާއި ބޭނުންވާ އިތުރު ކަންކަމަށް ހުސްވަގުތު ލިބި ސިކުނޑިއަށް މާބޮޑަށް ބާރުބޮޑު ނުވާނެ ގޮތަކަށެވެ.
ފުރިހަމަ ސިއްހަތަކަށް އިސްކަންދިނުން
7-9 ގަޑިއިރުގެ ނިދި ދަރިވަރުންނަށް ބޭނުންވެއެވެ. އެއިރުން ސިކުނޑި ރަނގަޅަށް މަސައްކަތްކުރަން އެހީތެރިވެދެއެވެ. އަދި ދުވާލަކު 15 ނުވަތަ 20 މިނިޓް ކުޅިވަރެއްކުޅެލާ ހިނގާލުމުން ފުރިހަމަ ސިއްހަތެއްގައި ދެމިހުރުމަށް އެހީތެރިވެދެއެވެ. އަބަދު ސްކްރީން ދެއްކުމުގެ ބަދަލުގައި އެކުދިން މުނިފޫހިފިލުވާނެ އިތުރު ގޮތްތައް ހޯދަންޖެހެއެވެ.
ދަރިވަރުންނާއި އޮންނަ ގުޅުން ވަރުގަދަކުރުން
ރާއްޖޭގެ ބައެއް ސްކޫލުތަކުގައި ވެސް ދަރިވަރުންގެ މެދުގައި މައްސަލަޖެހި ބުލީގެ ޝިކާރައަކަށް ކުދިންވަމުންދާ މަންޒަރު ވަނީ ފެނިފައެވެ. ދަރިވަރުންނާއި މުދައްރިސުންގެ ގުޅުން ރަނގަޅުވާންޖެހެއެވެ. އަދި މައިންބަފައިންނާއި ކުދިންގެ ގުޅުން ރަނގަޅުވާންޖެހެއެވެ. މިފަދަ މައްސަލަތައް ދިމާވެއްޖެނަމަ އެހީތެރިކަމަށް އެދުމުގެ ހިތްވަރު އެކުދިންނަށް ލިބޭނީ އެއިރުންނެވެ. ކަމެއް ދިމާވެއްޖެނަމަ އަވަހަށް އެހީތެރިކަން ހޯދާނެ ގޮތް ކިޔައިދޭންޖެހެއެވެ. އަދި އަމިއްލަ ނަފުސު ރައްކާތެރިކުރާ ފަދައިން އެހެން ކުދިންނަށްވެސް އިހުތިރާމްކުރަން ދަސްކޮށްދޭންޖެހެއެވެ.
ފިލާވަޅު ދުވަހުން ދުވަހަށް ނިންމަން އިސްކަންދިނުން
ބައެއް ދަރިވަރުންނަށް ދިމާވާ ގޮންޖެހުމަކީ އިމްތިހާން އަންނައިރު ފިލާވަޅުތައް ނުނިމި އިމްތިހާން ދުވަސްވަރު ހުރިހާ ފިލާވަޅެއް ނިންމާ މާބޮޑަށް ސިކުނޑިއަށް ބުރަބޮޑުވުމެވެ. ދުވަހުން ދުވަހަށް ނުވަތަ ހަފްތާއިން ހަފްތާއަށް ފިލާވަޅު ނިންމާ ދަސްކުރާނަމަ އިމްތިހާނު ދުވަސްވަރު ފަސޭހަވާނެއެވެ.
އަމާޒަށް ވާސިލުވުމަށް ދަސްކޮށްދިނުން
ސްކޫލުގެ ކިޔެވުން ފެށޭއިރު މިއަހަރު ދަރިވަރުން ހާސިލު ކުރަން ބޭނުންވާ އަމާޒަކީ ކޮބައިކަން ނިންމިދާނެއެވެ. "ސްމާރޓް ގޯލްސް" ނުވަތަ ޚާއްސަ، މިންކުރެވޭނެ، ހާސިލުކުރެވޭނެ، އެކަށޭނަ ގޯލެއް ކަނޑައަޅާށެވެ.
