ދިވެހި ފިލްމު އިންޑަސްޓްރީއަށް އަގުހުރި ހިދުމަތްތަކެއް ކޮށްދިން ރާއްޖޭގެ މަޝްހޫރު ފިލްމު ޑައިރެކްޓަރ އަބްދުލް ފައްތާހު ކުއްލި ގޮތަކަށް ނިޔާވީ އަންގާރަ ދުވަހުގެ ރޭގަނޑުއެވެ. އުފަން ރަށް ހއ. ކެލާ ގައި ދިރިއުޅޭ ފައްތާހު އަށް ހާޓްއެޓޭކެއް ޖެހިގެން އިތުރު ފަރުވާއަށް ގެންދިޔައީ އެއަތޮޅު ދިއްދޫ ހޮސްޕިޓަލަށެވެ. 

 

ކުރިއަށް އޮތް ލޯކަލް ކައުންސިލް އިންތިހާބުގައި ކެލާ ދާއިރާގެ ރައީސް ކަަމަށް ކުރިމަތިލުމަށް ކެމްޕެއިން ކުރަމުންދިޔަ ފައްތާހުގެ ދިރިއުޅުމުގައި ކުރިން ދިމާވި ހިތްދަތި ކަމަކާއި ގުޅިގެން މާލެ ދޫކޮށް ފިލްމީ ހަޔާތާއި އަލްވަދާއުކިޔާ ދިރިއުޅެމުން ދިޔައީ ރަށުގައެވެ. އާމްދަނީ ހޯދަން ފެއްޓީ އަމިއްލަ ވިޔަފާރިއެއް ފަށައިގެންނެވެ. ގެސްޓުހައުސް ވިޔަފާރިއާއި ރެސްޓޯރެންޓް ވިޔަފާރީގައި ކެލާގައި އެންމެ ނަގާކިޔާ އެކަކީ ފައްތާހެވެ. ރަށަށް އަރާ މެހެމާނުންނާއި، ހާއްސަކޮށް މީޑިއާ/އެންޓަޓެއިންމެންޓް އިންޑަސްޓްރީގެ މީހުންނަށް ހާއްސަ ގަދަރަކާއި ލޯތްބެއް ބެހެއްޓިއެވެ. ހިދުމަތުގައި އެވަރުގެ ދެވަނައެއް ނެތްފަދަ ހިތްހެޔޮ މިތުރެކެވެ. ރަށުގައި އައު ދިރިއުޅުމެއް ފަށައިގެން އުޅެމުން އައި ފައްތާހުގެ ޖަނާޒާ ކުރިއަށްގެންދިޔައީ ފަތިސް ނަމާދަށްފަހު ދިއްދޫ އިސްލާމީ މަރުކަޒުގައެވެ. ނިޔާވިއިރު އުމުރަކީ 54 އަހަރެވެ. 

 

 

ފައްތާހުގެ އޭރުގެ ހަނދާންތަކަށް ބަލާއިރު އޭނާއަކީ ރާއްޖޭގެ ފިލްމު އިންޑަސްޓްރީއަށް އިންގިލާބީ ބަދަލުތަކެއް ގެނެސްދިން ކުޅަދާނަ ޑައިރެކްޓަރެކެވެ. 14 ވިލޭރޭ، ހައްދު ފަދަ އަސަރުގަދަ ޖަޒްބާތީ ފިލްމުތަކާއި ހަމައިން 2019 ގައި ކެރިއަރު ނިންމާލިއަސް އޭނާގެ ހަނދާންތައް އެ އިންޑަސްޓްރީއަކުން ފޮހެވިގެން ނުދާނެއެވެ. އޭނާ އުފެއްދި ފިލްމުސްޓާރުން އެކަމަށް މިހާރުވެސް އެދަނީ ހެކި ދެމުންނެވެ. އޭނާ ވަނީ 2004 ވަނަ އަހަރު ސަރުކާރުންދޭ އާންމު ހިދުމަތުގެ ހިތްވަރު ދިނުމުގެ އިނާމު ހާސިލު ކޮށްފައެވެ. އަދި މިއަދު ކްރިސްޓަލް އެވޯޑްސްގެ އެންމެ މޮޅު އެޑިޓިން އާއި އެންމެ މޮޅު ޑައިރެކްޓަރގެ އެވޯޑު 2007 ވަނަ އަހަރު ހޯދިއެވެ. 

ގައުމީ ފިލްމް އެވޯޑުގެ އެންމެ މޮޅު ސްކްރީން ޕްލޭއާއި، އެންމެ މޮޅު ޑައިރެކްޝަން އަދި އެންމެ މޮޅު މޭކަޕްގެ އެވޯޑުވެސް ފައްތާހަށް ލިބިފައިވެއެވެ. އަދި 2012 ވަނަ އަހަރު ގައުމީ ފިލްމު އެވޯޑުސްގެ އެންމެ މޮޅު ޑައިރެކްޓަރ، އެންމެ މޮޅު އެޑިޓިން، އެންމެ މޮޅު ކޮރިއޯގްރަފީ އެވޯޑުވެސް ހޯދީ ފައްތާހެވެ. 2015 ވަނަ އަހަރުވެސް ގައުމީ ފިލްމު އެވޯޑްސްގައި މި ތިން އެވޯޑު އޭނާއަށް ލިބުނެވެ. މީގެ އިތުރަށް އެއަހަރުގެ އެންމެ މޮޅު އާޓް ޑިރެކްޓާރގެ އެވޯޑުވެސް ލިބުނީ ފައްތާހަށެވެ. މީގެ އިތުރުން ޓީވީ މޯލްޑިވްސް އާއި ރާއްޖެ ޓީވީއިން ގެނެސްދިން ބައެއް ޕްރޮގްރާމްތަކާއި ލަވަތަކާއި ޑްރާމާތަކަކީވެސް ފައްތާހުގެ އުފެއްދުންތަކެވެ. "ވައްޓަފާޅި" ފަދަ ދިވެހިންގެ ދިރިއުޅުން ދައްކައިދޭ ޓީވީ ޝޯތައް އޭނާ ހެދިއެވެ. 

 

އޭނާގެ ޒުވާން އުމުރު އެކަމަށް ހުސްކޮށްލި ފިލްމީ ހަޔާތް ނިންމާލާފައި ދާއިރާ ދޫކޮށްލީވެސް ހުސްއަތަކާނޫނެވެ. އޭނާ ބައިވެރިވި އެންމެފަހު ގައުމީ ފިލްމު އެވޯސް ހަފްލާއިން ނިކުމެގެން ދިޔައީ 2019 ވަނަ އަހަރު އުފެއްދި ފަހު ފިލުމު "ހައްދު" ން އެންމެ މޮޅު ޑައިރެކްޓަރގެ އެވޯޑާއި އެންމެ މޮޅު އާޓް ޑައިރެކްޓަރުގެ އެވޯޑު ހިފައިގެންނެވެ. އެ ދުވަހު ފިލްމީ އާއިލާއަށް ކީ އަލްވަދާއުން ދިވެހި ސިނަމާ ރޮއްވާފައި ދިޔައީ އެނބުރި ފިލްމީ މަސައްކަތެއް ނުކުރާނެ ކަމަށް ބުނެ އެތައްބައެއްގެ ހިތް ރޮއްވާފައެވެ. ފިލްމު އިންޑަސްޓްރީއަށް އެދުވަހު ކުރިމަތިވި މާޔޫސްކަމަށްވުރެ ބޮޑު ހިތްދަތިކަމެއް މިއަދު ލިބިފައިވަނީ އޭނާ ދުވަހަކުވެސް ދެން ނުފެންނާނެ ކަމުގެ ކުއްލި ހަބަރުންނެވެ.

 

 

ފިލްމުތަކުގެ ޒަރިއްޔާއިން މުޖުތަމައުގައި ހުރި ނޭދެވޭ ކަންކަމަށް މީހުން ހޭލުންތެރިކުރުވާ މުޖުތަމައު އިސްލާހު ކުރުމުގައި އަވަދިނެތި އުޅުނު އެ ދުވަސްތައް މާޒީއަށް ދޫކޮށްލާ މިފަހުން އޭނާ އުޅުނީ ސިޔާސީ މަސައްކަތުގައެވެ. ރަށާއި އަތޮޅުގެ ކަންކަން އިސްލާހުގެ މަގަށް ގެނައުމުގައެވެ. އަވަދިނެތި ކުރަމުން އައި ސިޔާސީ މަސައްކަތުގައި އިތުރު ހަރުފަތަކަށް ކުރިޔަށް ޖެހިލައި ރަށުގެ ގިނަ ބައެއްގެ އެދުމާއެކު ފައްތާހު ހުރީ ވަރުގަދަ ސިޔާސީ ކެމްޕޭނެއްގައެވެ. އެކުވެރިންނާ ބައްދަލުކޮށް ރަށުގެ ތަރައްޤީއަށް ހުރި މުހިންމު ކަންކަމުގެ މަޝްވަރާތަކުގައި އިއްޔެވެސް އުޅުނެވެ. ކެލާ ކައުންސިލުގެ ރައީސްގެ މަގާމަށް އައުމަށް ކުރަމުން އައި އުންމީދާއި އޭނާއަށް ތާއީދުކުރާ ރައްޔިތުންގެ އެ އެދުން ފުރިހަމަ ނުކޮށްދެވި އުޅެނިގެން ވަކިވެގެން އެދިޔައީ އެނބުރި އައުމެއް ނެތް ހަޔާތަށެވެ. ނިވިގެން އެދިޔައީ ފައްތާހު އެމަގާމަށް ގެންނަން ބޭނުންވި މީހުންގެ އުންމީދުގެ ހުޅުކޮޅެެވެ.