ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ރައްޔިތުންނާއި ބައްދަލުކުރެއްވުމަށް ބާއްވާ ބައްދަލުވުންތަކުގައި ތަފާތު ޝަކުވާތައް އަޑުއިވެއެވެ. އެކަމަކު އެންމެ ގިނަބަޔަކު އަސަރާއެކު ފާހަގަކުރާ މައްސަލައަކީ ބޯހިޔާވަހިކަމުގެ މައްސަލައެވެ. މިހާތަނަށް އެއްވެސް ސަރުކާރަކުން ހައްލު ހޯދައިދެވިފައިނުވާ މައްސަލައެކެވެ.
މާލެ ސަރަހައްދުގައި ދިރިއުޅޭ ގިނަ މީހުންނަކީ ބޮޑު ކުލީގައި ދިރިއުޅޭ މީހުންނެވެ. ބައެއް މީހުން މާލޭގައި ދިރިއުޅެނީ މަޖުބޫރީ ހާލަތުގައެވެ. އާއިލާގެ ކޮންމެވެސް މެންބަރަކަށް އަމިއްލަ ރަށުން ސިއްހީ ފަރުވާ ލިބެން ނެތުމުންނެވެ. ނޫނީ ދަރިންނަށް ކިޔަވައިދިނުމުގެ ބޭނުމުގައެވެ.
ގަލޮޅު ރައްޔިތުންނާއެކު ރައީސް ރޭގައި ބޭއްވި ބައްދަލުކުރެއްވުމުގައި ވެސް މީހަކު ވަނީ އަސަރާއެކު އޭނާގެ ހާލަތު ކިޔައިދީފައެވެ. އދ. މާމިގިއްޔަށް އުފަން މުހައްމަދު މޫސާ އަށް އުމުރުން 70 އަހަރު ވީއިރު، އޭނާ ދަފުތަރުގައި ރަޖިސްޓްރީ ކުރިތާވެސް 40 އަހަރު ވީއެވެ. ރައީސް ނާސިރުގެ ދުވަސްވަރުން ފެށިގެން މާލޭގައި ދިރިއުޅޭއިރު ބޯހިޔާވަހިކަމެއްގެ އުންމީދުގައި އަމިއްލަ ރަށުގެ ރަޖިސްޓްރީއިން އުނިކޮށް މާލެ ދަފުތަރުގައި ރަޖިސްޓްރީވުމުން ވެސް މުޅި އުމުރު ހޭދަކުރަންޖެހުނީ ބޮޑު ކުލީގައިކަމަށް ވަނީ ބުނެފައެވެ.
ލިބުނު 7 ދަރީންގެ ތެރެއިން ފުރަތަމަ ދަރިފުޅަކީ ބަލި ކުއްޖަކަށްވުމުން ލިބުނު މުދަލަކާއި ފައިސާއެއްވިއްޔާ ޚަރަދު ކުރަންޖެހުނީ އެދަރިފުޅަށް ބޭސްކުރާށެވެ. ސަލާންޖަހައިގެން ދަރިފުޅަށް ބޭސްފަރުވާ ކޮށްދިނެވެ.
" އަޅުގަނޑުގެ ފުރަތަމަ ދަރިފުޅަކީ ވިހޭއިރުވެސް ފުރަގަސްފަރާތް އަދި ކުރިމަތިފަރާތްވެސް ނެތް ކުއްޖެއް. ސަލާންޖަހައިގެންނާއި އަޅުގަނޑުގެ އަތުގައި ހުރި މުދާ ވިއްކާފަ ލަންކާއަށް ދިޔައީ ބޭސްފަރުވާއަށް. އަޅުގަނޑަށް ރާއްޖެ އާދެވުނީ އަހަރެއް ވާން އުޅެނިކޮށް ބޭސްފަރުވާއަށްފަހު. ރައީސް މައުމޫނު ވެރިކަމުގައި ގޯތި ދޭވާހަކަ އަޑުއިވިގެން ފޯމުލީ. ޓިކެޓު މާދަމާއަށް ފުރާގޮތަށް ނަގާފައި އޮއްވާ އަޅުގަނޑަށް އަންނަނީ ފޯނުކޯލެއް މިއަދު ހަވީރު 4 ޖަހާއިރަށް ސްޓޭޑިއަމްއަށް ދާން. އެތަނުން ގުރުއަތުލައިގެން ހުޅުމާލެއިން ގޯއްޗެއް ލިބުނު. އެ ގޯތި އެހެން އޮއްވާ އެދައްކަން ބުނާ ލާރި ކިހިނެއްތޯ ދައްކާނީ. އެއިރު އަތުލިޔުމުން ސިޓީ ލިޔަން ޖެހެނީ. ފުރަން ދަމުން ބަލިކުއްޖާ ގޮވައިގެން ގޮސް ހާލަތުވެސް ކިޔައިދިނިން. ހަމަ ބުނަނީ ސިޓީއެއް ލާން. ސިޓީއެއް ލިޔެފައި ދޭންވެސް އެދުނިން. ރޮއެފަ އާދޭސްކުރީމަވެސް ގޮތް ދޫނުކޮށް މިބޭބެ ފޮނުވާލީ. އެކުއްޖާ ގޮވައިގެން ލަންކާއަށް ދިޔައީ. ގޯތި ހޯދަން ލަންކާއިން އައިސް ފަހުން ދިޔައިމަ ބުނީ ތި ގޯއްޗެއް ދެނެއް ނުލިބޭނޭ ވަގުތު ފާއިތުވެއްޖޭ. އަޅުގަނޑު ދިޔައީ ކުއްޖާގެ ފުރާނަ ސަލާމަތްކުރަން. އެކަމަކު ގޯތި ނުދީ ހިފަހައްޓައިގެން މިހާހިސާބަށް މިއައީ. 7 ކުދިން ގޮވައިގެން މަގުމަތީ މިދުވަނީ. މޮޔަވާހަމައަށް ގޮއްސި". ރޮމުން ރޮމުން މުހައްމަދު މޫސާ ކިޔައިދިނެވެ.
15 އަހަރު ދުވަސްވަންދެން ސަރުކާރުގައި ވަޒީފާވެސް އަދާކޮށްފައިވެއެވެ.
" މި މުހައްމަދު މޫސާ ދަފުތަރުގައި އިންނަތާ 40 އަހަރު. އުޅޭނެ ތަނެއް ވަންނާނެ ތަނެއް ނެތް. ދަފުތަރުގައި ޖެހިފައި އިންނަނީކީ ރީއްޗަކަށް ނޫނޭ ކޮއްކޯ. ވަންނާނެ ގެއެއް ގެދޮރެއް ނެތީމާ. ކީއްތަވާނީ މި ބޭބެ އަށް ތަންކޮޅެއް ދިނިއްޔާ؟" ރޮމުން ރޮމުން އާދޭހާއެކު ބުނެފައިވެއެވެ.
މުޅި އުމުރު އެހޭދަކުރީ ވަންނާނެ އަމިއްލަ ގެއެއް ލިބޭތޯ އެވެ. މިއީ މިއަދު ރާއްޖޭގެ ޚާއްސަކޮށް މާލެ ސަރަހައްދުގައި ދިރިއުޅޭ އެތައްބައެއްގެ ހާލަތެވެ. ވަރަށް ދަތި ހާލުގައި ދިރިއުޅޭ އެތައްބަޔަކު އެބަތިއްބެވެ. އެކަމަކު ކޮންމެވެސް ސަބަބަކާހުރެ އެމީހުންނަށް ގޯއްޗެއް ނުވަތަ ފުލެޓުވެސް ނުލިބެނީއެވެ. އިންސާފުވެރިކަމާއެކު ދަތިހާލުގައި އުޅޭ އަދި ހައްގުވެރިންނަށް ފުލެޓު ހޯދައިދޭންޖެހެއެވެ.
ރައީސް ޑރ. މުޢިއްޒުގެ ސަރުކާރުގައި ބޯހިޔާވަހިކަމަށް އިންގިލާބީ ބަދަލެއް ގެންނަވާނެކަމަށް ތަކުރާރުކޮށް ވަނީ ވިދާޅުވެފައެވެ. އަދި މިމައްސަލައަށް ހައްލު ހޯދުމުގެ ގޮތުން މިސަރުކާރުން އަންނަ އަހަރު ކުރީކޮޅު ފުލެޓަށް ކުރިމަތިލުމަށް އިއުލާން ކުރާނެކަމަށް ވަނީ ބުނެފައެވެ. ހުޅުމާލެ އާއި ރަސްމާލޭގެ ބިންވެސް ދަނީ ހިއްކަމުންނެވެ.
