އަންނަ ޖެނުއަރީ މަހުގެ 1 ވަނަ ދުވަހުން ފެށިގެން އަމަލުކުރުމަށް ހަމަޖެހިފައިވާ ޒަކާތުގެ ޤާނޫނުގައި ވަނީ ވަރަށް ތަފްސީލުކޮށް މުދަލުގެ ޒަކާތް ދެއްކުން ލާޒިމުވާ މުދަލުގައި ފުރިހަމަވާންޖެހޭ ޝަރުތުތައް ބަޔާންކޮށްފައެވެ.
އަންނަނިވި ޝަރުތުތައް އެ މުދަލެއްގައި ފުރިހަމަވެއްޖެ ކޮންމެ މުދަލަކުން، މުދަލު ޒަކާތް ދެއްކުން ލާޒިމުވާނެއެވެ.
1- އެ މުދަލަކީ ޒަކާތް ދައްކާ ފަރާތުގެ ފުރިހަމަ މިލްކުވެރިކަމުގެ ދަށުގައިވާ މުދަލަކަށްވުން
2- ޒަކާތުގެ ޤާނޫނުގެ 25 ވަނަ މާއްދާގައި ބަޔާންކުރާ ގޮތުގެ މަތިން އެމުދަލެއްގައި ޒަކާތުގެ ނިސާބު ފުރިހަމަވެފައިވުން
3- އެ މުދަލަކީ މި ޤާނޫނުގެ 23 ވަނަ މާއްދާގައި ބަޔާންކުރާ ޒަކާތް ދެއްކުން ލާޒިމު މުދަލަކަށްވުން
4- މި ޤާނޫނުގެ 25 ވަނަ މާއްދާގައި ބަޔާންކުރާ ގޮތުގެމަތިން އެ މުދަލެއްގައި ޒަކާތުގެ ނިސާބު ހަމަވުމަށްފަހުގައި މި ޤާނޫނުގެ 26 ވަނަ މާއްދާގައި ބަޔާންކުރާ ގޮތުގެ މަތިން ޒަކާތް ލާޒިމުވުމުގެ މުއްދަތު ފުރިހަމަވެފައިވުން
އަންނަނިވި ހާލަތްތަކުގައި މުދަލަކުން މުދަލުގެ ޒަކާތް ދެއްކުން ލާޒިމުވެގެން ނުވެއެވެ.
1- އެ މުދަލަކުން އެ މުދަލުގެ މިލްކުވެރި ފަރާތަށް ފައިދާ ލިބިގަނެވެން ނެތުން
2- އެ މުދަލަކުން އެ މުދަލުގެ މިލްކުވެރި ފަރާތަށް ހޭދަކުރުމުގެ ބާރު ލިބިފައި ނެތުން
3- އެ މުދަލެއް ޒާތީ ނުވަތަ އަމިއްލަ ބޭނުމަކަށް ބޭނުންކުރެވެމުން ދިޔުން
4- އެ މުދަލެއް ހަރުމުދަލުގެ ގޮތުގައި ބޭނުންކުރެވެމުން ދިޔުން
ޒަކާތް ދެއްކުން ލާޒިމު މުދާ
1- ރަން
2- ރިހި
3- ނަޤުދު ފައިސާ
4- ވިޔަފާރި މުދާ
5- ނަޢަމް ސޫފި (ޖަމަލު، ގެރި، ބަކަރި)
6- ދަނޑުފަނގާއި މޭވާ
7- ރިކާޒާއި މައުދަން
8- ހިއްސާ އާއި ސުކޫކު
9- ހަރުމުދާ
10- އުޖޫރައާއި މުސާރަ
11- ޒަކާތް ދެއްކުން ލާޒިމު މުދަލެއްގެ ގޮތުގައި ޒަކާތު ހައުސްއިން ކަނޑައަޅާ އެނޫންވެސް މުދާ
މުދަލުގެ ޒަކާތް ދެއްކުން އިސްތިސްނާވާ މުދާ
1- ދައުލަތާއި ސަރުކާރުގެ އިދާރާތަކުގެ މުދާ
2- އާންމު މަންފާއަށް ޚާއްސަކުރެވިފައިވާ އަދި ވަޤުފުކުރެވިފައި ހުންނަ މުދާ
3- ޚައިރާތު ފަންޑުތަކުގައި ހުންނަ މުދަލާއި ފައިސާ
4- މަދަނީ ޖަމްޢިއްޔާތަކުގެ މުދާ
