ކީރިތިވަންތަ މާތް ﷲ މިދުނިޔެއާއި ދުނިޔޭގައި ވާހައި އެއްޗެއް އުފައްދަވައި ފުޅާ ދާއިރާއެއްގައި އެ ތަކެތީގެ ބޭނުންހިފުން އިންސާނުންނަށް ހުއްދަ ކުރެއްވިއެވެ. ހަރާމް ކުރައްވައިފައިވަނީ ނިސްބަތުން ވަރަށް މަދު އެއްޗެކެވެ. އެއީ އެތަކެތީން ލިބިދާނޭ ބޮޑު ގެއްލުމަކަށްޓަކައެވެ.
މާތް ﷲ ވަހީކުރައްވައިފައިވެއެވެ. މާނައީ: " އޭ މީސްތަކުންނޭވެ. ބިމުގައިވާ ތަކެތީގެ ތެރެއިން ހަލާލު ރަނގަޅު ތަކެތި ތިޔަބައިމީހުން ކައިއުޅޭށެވެ! އަދި ޝައިޠާނާގެ ފިޔަވަޅުތަކަށް ތިޔަބައިމީހުން ތަބަޢަނުވާށެވެ! (އެހެނީ) ހަމަކަށަވަރުން އެ ޝައިޠާނާއީ ތިޔަބައިމީހުންނަށް ހުރި ކަނޑައެޅި ބަޔާންވެގެންވާ އަދާވާތްތެރިއެކެވެ".
ދުންފަތަކީ ވަރަށް ގިނަ ގޮތްގޮތުން ގެއްލުންހުރި އެއްޗެއްކަން ކަމާގުޅޭ ގޮތުން ކުރެވިފައިވާ އެންމެހައި ދިރާސާތަކުން ސާބިތުވެފައިވެއެވެ. އެހެނަސް ދުންފަތުގެ އިސްތިއުމާލުކުރާ މީހުން އެކަމާމެދު މާބޮޑު ފަރުވާލެއް ނުބަހައްޓައި އެކަން ކުރެއެވެ. ތިމާމެންގެ އަމިއްލަ އަތްތަކުން ތިމާމެންގެ އަމިއްލަ ހަށިތައް ހަލާކުގެތެރެއަށް ވައްޓައިލައެވެ. ބުރަ މަސައްކަތުން ހޯދާ ފައިސާ ބޭކާރުގޮތުގައި ހޭދަކޮށް އަމިއްލަ ހަށިގަނޑަށް ގެއްލުންދެއެވެ. އަމިއްލަ ބޭނުންތަކަށާއި އަނބިދަރީންނަށާއި، ގާތްތިމާގެ މީހުންނަށާއި، ޙާޖަތްތެރީންނަށް އެ ފައިސާ ހޭދަކުރުމުގެ ބަދަލުގައި އެއްވެސް ފިކުރެއް ނެތި ތިމާގެ އަމިއްލައަތުން އަލިފާންޖަހައި އަންދައިލާން ހެޔޮވާނީ ކިހިނެއްހެއްޔެވެ؟
ދުންފަތުން އިސްތިއުމާލު ކުރުމުން ގެއްލުން ލިބެނީ ހަމައެކަނި އެކަން ކުރާ ބަޔަކަށް ނޫނެވެ. މީހުން އެއްވެ އުޅޭ ތަންތާނގައި ދުންފަތުގެ އިސްތިއުމާލު ކުރުމުން އެތަނެއްގައި ތިބި ދުންފަތުގެ އިސްތިއުމާލު ނުކުރާ މީހުންނަށް ވެސް ބޮޑެތި ގެއްލުން ލިބެއެވެ. އެހެންކަމުން ގިނަ ޤައުމުތަކުގައި މިއަދު ވަނީ މީހުން އެއްވެ އުޅޭ ތަންތާނގައި ދުންފަތުގެ އިސްތިއުމާލު ކުރުން މަނާކޮށްފައެވެ.
ދުންފަތުން އިސްތިޢުމާލު ކުރުމަކީ ތިމާގެ އަމިއްލަ ނަފުސަށާއި މުޅި މުޖުތަމަޢުގެ ހައްޤުގައި ކުރެވޭ ބޮޑު އަނިޔާއެކެވެ. ވީއިރު މި ސުންޕާ ވަބާއިން މުޖުތަމަޢު ސަލާމަތްކުރުމަށްޓަކައި ވަރުގަދަ އަޒުމަކާ ކުރިމަތިލާށެވެ. ފުރަތަމަ އަމިއްލަ ނަފުސެވެ. ދެން އާއިލާއެވެ. އެއަށްފަހު މުޖުތަމަޢެވެ. ހަގީގީ ރަހުމަތްތެރިންނަކީ ހެޔޮކަންކަމަށް މަގުފަހިކޮށްދީ ހެޔޮ ނަސޭހަތްދޭ މީހުންނެވެ. ނުބައި ކަންކަމަށް ހިތްވަރުދޭ މީހުން ރަހުމަތްތެރިންކަމުގައި ނުބަލާށެވެ. ގެއްލުންދޭ، އަދި ގެއްލުމަށް މަގުފަހިކޮށްދޭ ކޮންމެ އެއްޗަކުން ދުރުހެލިވާންޖެހޭކަމާއި އެފަދަ ކަމެއް ކުރުމީ ހަރާމްކަމެއްކަމުގައި ޢިލްމުވެރިން އިއްތިފާގުވެވަޑައިގެންފައިވެއެވެ.
މައުލޫމާތު: ހުކުރު ޚުޠުބާ
