ބާރުގަދަ ތޫފާނެއް ކަމުގައިވާ 'ދިތުވާ' އާއި ގުޅިގެން ސްރީލަންކާއަށް ދިމާވެފައިވާ ކާރިދީ ހާލަތާއި ގުޅިގެން އެޤައުމަށް އެހީތެރިވުމުގެ ގޮތުން ޕީއެސްއެމް އާއި މީޑިއާތައް ގުޅިގެން ކުރިއަށްގެންދާ ޓެލެތޯނަށް މިހާތަނަށް 7 މިލިއަނަށްވުރެ ގިނަ ރުފިޔާ ލިބިއްޖެއެވެ.
މިއަދު މެންދުރު 1 ޖެހުމާއި ހަމައަށް ޖުމްލަ 7،014،711 ރުފިޔާ ވަނީ ލިބިފައެވެ. އޭގެ ތެރޭގައި ހިމެނެނީ 6،255،399 ރުފިޔާ އާއި 42،757 ޑޮލަރެވެ.
އާދީއްތަ ދުވަހު ހެނދުނު 9 ޖެހިއިރު ފެށި ޓެލެތޯން ކުރިއަށްގެންދިއުމަށް ކުރިން ހަމަޖެހިފައިއޮތީ އާދީއްތަ ދުވަހުގެރޭ މެންދަމު 1 ޖެހުމާއި ހަމައަށެވެ. އެހެންނަމަވެސް ފަހުން ޓެލެތޯންގެ ވަގުތު ވަނީ ހޯމަ ދުވަހުގެ މެންދުރުފަހު 2 ޖެހުމާއި ހަމައަށް އިތުރުކޮށްފައެވެ.
- އޮންލައިންކޮށް ފައިސާ ޓްރާންސްފަރ ކުރެވޭނެ
- މާލެ، ހުޅުމާލެ، ވިލިމާލެ އެކި ސަރަހައްދުތަކުގައި ފަންޑުފޮށި ވަނީ ބެހެއްޓިފައި
ޓެލެތޯނަށް ލިބޭ ފައިސާ ޖަމާކުރުމަށް ޚާއްސަ އެކައުންޓެއް ވަނީ ހުޅުވާފައެވެ. އެއީ ދިވެހި ރުފިޔާ އެކައުންޓު ނަންބަރު: 7730000796107 އަދި ޑޮލަރު އެކައުންޓު ނަންބަރު 7730000796106 އެވެ.
ސްރިލަންކާގައި ފެންބޮޑުވެ 300 އަށްވުރެ ގިނަ މީހުން މަރުވެ 200 އަށްވުރެ ގިނަ މީހުން ވަނީ ގެއްލިފައެވެ. މިކާރިސާގެ އަސަރު އެޤައުމުގެ މިލިއަނެއްހާ މީހުންނަށް އެކި ގޮތްގޮތަށް ވަނީ ކޮށްފައެވެ. 180،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ބަދަލުކޮށްފައެވެ. ބިންގަނޑުކަނޑައިގެން ދިއުމުގެ އިތުރަށް ފެންބޮޑުވުމުން ބައެއް ސަރަހައްދުތަކަށް އެއްގަމު ދަތުރު ނުކުރެވޭ ހާލަތަށް ސްރީލަންކާ ވަނީ ގޮސްފައެވެ.
