ބާއްޖަވެރިކަމަކީ އިންސާނުން އެ ނިޢުމަތެއް ހޯދުމަށްޓަކައި އެންމެ ބޮޑަށް މަސައްކަތްކުރާ އެއް ނިޢުމަތެވެ. ބާއްޖަވެރިކަމާއި އުފާވެރިކަން ހޯދުމުގައި މުސްކުޅިއެއް، ޒުވާނެއް، މުއްސަންޖެއް ފަޤީރެއް، މުސްލިމެއް ޣައިރު މުސްލިމެއް ތަފާތެއް ނެތެވެ. އެއެންމެންވެސް ބޭނުންވަނީ ބާއްޖަވެރިކަމާއި އުފާވެރިކަމެވެ.
މިއަދު ގިނަބަޔަކު ޤަބޫލުކުރާ ގޮތުގައި އުފާވެރިކަމާއި ބާއްޖަވެރިކަންއޮތީ މުދަލާއި ފައިސާއާއި ޖާހާއި މަންސަބާއި މަޝްހޫރުކަމުގައެވެ. ދަންނާށެވެ. ކަންއޮތީ އެހެންނަކުންނޫނެވެ. އެއްވެސް ޝައްކެއްނެތް ގޮތުގައި ހަޤީޤީ ބާއްޖަވެރިކަމަކީ ހިތުގެ އުފާވެރިކަމާއި ނަފުސުގެ ހަމަޖެހުމެވެ. މިކަންކަން ދެއްވުމުގެ ބާރު ލިބިވޮޑިގެންވަނީ ﷲ ސުބުހާނަހޫ ވަތަޢާލާ އަށެވެ. އަދި އެކަލާންގެއަށް ކިޔަމަންތެރިވުމުން މެނުވީ މިކަންކަން ހާސިލެއްނުވާހުއްޓެވެ.
ހަމަކަށަވަރުން އިންސާނާ ޚަލްޤުކުރެއްވީ ގަދަކީރިތިވަންތަ ﷲ ސުބުހާނަހޫ ވަތަޢާލާއެވެ. އަދި އެ އިންސާނާ ބާއްޖަވެރިވާނޭ ކަންކަމާއި އަބާއްޖަވެރިވާނޭ ކަންކަން ވެސް މޮޅަށް ދެނެވޮޑިގެންވަނީ އެކަލާނގެއެވެ.
ބާއްޖަވެރިކަމުގެ އަސާސަކީ އިސްލާމް ދީނެވެ. އެހެނީ އިސްލާމް ދީނަކީ ﷲ ސުބުހާނަހޫ ވަތަޢާލާ އިންސާނުން މި ދުނިޔޭގައި ދިރިއުޅުމަށްޓަކައި އިޚްތިޔާރުކުރައްވައިފައިވާ މަގެވެ. އެއީ ނަފުސުގެ ހަމަޖެހުމާއި ހިތްތައް އިސްލާހުގެ މަގަށް ގެންދާ ފުރިހަމަ ނިޒާމެވެ. މިނިޒާމުން ހެޔޮކަމާއި ބަރަކާތުގެ މަގުތައް ހުޅުވެއެވެ.
ބާއްޖަވެރިކަމުގެ އެއް ސަބަބަކީ އިސްލާމީ ޝަރީޢަތަކީ ފުރިހަމަ އަދި ޝާމިލު ޝަރީޢަތެއްކަން އެނގުމެވެ. ބައެއް މީހުންނަށް ހީވެފައި އޮންނަނީ އިސްލާމީ ޝަރީޢަތަކީ ދިރިއުޅުމުގެ ހުރިހައި ދާއިރާއެއް ޝާމިލުވާގޮތަށް އޮތް ފުރިހަމަ ނިޒާމެކެވެ. އިސްލާމީ ޝަރީޢަތުގައި ޢަޤީދާއާއި އަޅުކަމާއި އަޚްލާޤާއި އާއިލީ ގުޅުންތަކާއި ތަރިކައާއި އިޤްތިސާދާއި ސިޔާސީ އަދި ބައިނަލްއަޤްވާމީ ގުޅުންތަކާއި ހަމަހަމަކަމާއި އަދުލު އިންސާފާއި މިފަދަ އެންމެހައި ދާއިރާތަކާއި ކަންކަން ހިމެނެއެވެ.
ދުނިޔަވީ ބާއްޖަވެރިކަން އޭގެ އެންމެ ފުރިހަމަ ގޮތުގައި އިސްލާމީ ޝަރީޢަތް ވަނީ ހޯދައިދީފައެވެ. އިސްލާމީ ޝަރީޢަތުގައި ވަނީ އަދުލުވެރިކަމާއި އިހްސާންތެރިކަމާއި މީސްތަކުންގެ ހައްޤުތައް ރައްކާތެރިކޮށްދީފައެވެ. މި ޝަރީޢަތުގައި ފަޤީރުންނާއި ޔަތީމުންނާއި އަންހެނުންނާއި ކުޑަކުދީންނާއި ޣައިރުމުސްލިމުންނަށް ވެސް ދުނިޔޭގެ އެއްވެސް ނިޒާމެއްގައި ނުދޭހާ ފުރިހަމައަށް އެހައްޤުތައް ވަނީ ކަށަވަރުކޮށްދީފައެވެ.
އިސްލާމީ ޝަރީޢަތް ވަނީ މީސްތަކުންގެ ކިބައިގައި ތެދުވެރިކަމާއި އަމާނާތްތެރިކަމާއި ރަހުމަތާއި ޢިއްފަތްތެރިކަމާއި އިހުސާންތެރިކަން އަށަގެންނެވުމަށް ވަރަށް ބޮޑަށް ބާރުއަޅުއްވައިފައެވެ. މިފަދަ ފުރިހަމަ ނިޒާމެއް ފަލްސަފާއެއް ނުވަތަ އުސޫލެއް އިސްލާމްދީން ފިޔަވައި މިދުނިޔެއަކު ނުވެއެވެ. މިއީ ދުނިޔެއާއި އާޚިރަތުގެ ބާއްޖަވެރިކަމާއި ނިޢުމަތަށް އިންސާނާ ގެންދާ ދީނެވެ.
މައުލޫމާތު: ހުކުރު ޚުޠުބާ
