އުރީދޫ މޯލްޑިވްސްގެ ކްލަބް ޕްރިމިއަރ ގޯލްޑް އަދި ޕްލެޓިނަމް މެމްބަރުންނަށް ހިލޭ ޕްރިއޯރިޓީ ޕާސް މެމްބަޝިޕްގެ ދަށުން ދުނިޔޭގެ އެކި ކަންކޮޅުތަކުގައި 1300 އަށް ވުރެ ގިނަ އެއަރޕޯޓް ލައުންޖްތަކަށް ވަނުމުގެ ފުރުސަތު ލިބިގެންދާނެ ކަމަށް އުރީދޫއިން ވަނީ މައުލޫމާތު ދީފައެވެ. މިއީ އުރީދޫގެ ކަސްޓަމަރުންނަށް ދަތުރުތަކުގައި ލުއިފަސޭހަ އަދި ލަގްޒަރީ ގޮތްތަކެއް ފަހިކޮށްދީ، ލޯޔަލްޓީގެ އަގު ވަޒަން ކުރުމުގެ ގޮތުން ފޯރުކޮށްދޭ ޚިދުމަތެކެވެ.
" ކްލަބް ޕްރިމިއަރ ގޯލްޑް ނުވަތަ ޕްލެޓިނަމް މެމްބަރެއްގެ ގޮތުގައި ތިން މަސް ދުވަސް ދެމިހުންނަ ފަރާތްތަކަށް ޕްރިއޯރިޓީ ޕާސް ނެގޭނެ. ޕްރިއޯރިޓީ ޕާސް އެކްޓިވޭޓް ކުރުމުން ދުނިޔޭގެ އެކި ކަންކޮޅުތަކުގައި ހުންނަ ލައުންޖުތަކަށް ވަދެވޭނެ. ދުނިޔޭގެ އެކި ކަންކޮޅުތަކުގައި ލައުންޖް އެކްސެސް ކުރުމުގެ އިތުރުން، ކްލަބް ޕްރިމިއަރ މެމްބަރުންނަށް ރާއްޖޭގެ އެކި ކެފޭ، ރެސްޓޯރަންޓް، ފިހާރަ ފަދަ ގިނަ ތަންތަނުން ލިބޭ ހާއްސަ ޑީލްތަކުން ވެސް ފައިދާ ލިބި، ކަސްޓަމަރުންނަށް ހާއްސަ އަގުތަކެއް ލިބިގެންދާނެ". އުރީދޫއިން ހާމަކޮށްފައިވެއެވެ.
ގޯލްޑް އަދި ޕްލެޓިނަމް ކްލަބް ޕްރިމިއަރ މެންބަރުންނަށް ޕްރިއޯރިޓީ ޕާސް ލިބުމަކީ ކަސްޓަމަރުންނަށް ލިބެމުންދާ ބެނެފިޓްސް އާއީ ފައިދާތައް އިތުރަށް ފުރިހަމަވެގެންދާ ކަމެކެވެ. އުރީދޫ މޯލްޑިވްސް އިން މަސައްކަތް ކުރަމުންދަނީ ދިރިއުޅުމުގެ އެކި ކަންކަމުގައި ކަސްޓަމަރުން ބޭނުންވާފަދަ ފަސޭހަތަކެއް ހޯދައިދިނުމަށެވެ. ބޭނުމަކީ ކަސްޓަމަރުންގެ އަގު ވަޒަންކުރުން ކަމަށް އެކުންފުނިން ވަނީ މައުލޫމާތު ދީފައެވެ. ޕްރިއޯރިޓީ ޕާސް އެކްޓިވޭޓް ކުރުމަށް ސޯޝަލް މީޑިއާ ނުވަތަ ލައިވް ޗެޓް މެދުވެރިކޮށް އުރީދޫ ކަސްޓަމަރ ސާވިސް އަށް މެސެޖުކޮށްލެވިދާނެއެވެ.
