އުރީދޫ ނޭޝަން އިން އިންތިޒާމުކޮށްގެން ބޭއްވި އެލީޓް ޝޯޑައުން 2025 - އީ.އޭ.އެފް.ސީ ސީރީޒް ވަނީ ކާމިޔާބުކަމާއެކު ނިންމާލާފައެވެ. މަޤްބޫލު ފުޓްބޯޅަ ވީޑިއޯ ގޭމެއް ކަމަށްވާ އީ.އޭ.އެފް.ސީ ގެ މި މުބާރާތް ބޭއްވުނީ ހުޅުމާލޭގައި ހުންނަ އުރީދޫ މޯލްޑިވްސްގެ ހެޑްކުއާޓާރސްގައެވެ.
ސިންގަލް އެލިމިނޭޝަން ފޯމެޓެއްގައި ކުރިއަށް ގެންދެވުނު މި މުބާރާތުގައި ޖުމްލަ 24 ކުޅުންތެރިން ވަނީ ވާދަކޮށްފައެވެ.
މުބާރާތުގެ ޗެމްޕިއަންކަން ހޯދި މުހައްމަދު އައިމަނަށް 5،000 ރުފިޔާގެ ފައިސާގެ އިނާމު ވަނީ ދީފައެވެ. ދެވަނައަށް ދިޔަ ޢަބްދުﷲ މާހިލަށް 3،000 ރުފިޔާ އަދި ތިންވަނައަށް ދިޔަ މުޙައްމަދު ޒަމީލަށް 2،000 ރުފިޔާގެ އިނާމު ވަނީ ދީފައެވެ.
މުބާރާތް ނިންމުމުގެ ރަސްމިއްޔާތުގައި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ އިސްވެރިން އަދި ރޭސިން އެސޯސިއޭޝަން އޮފް މޯލްޑިވްސްގެ އިސްވެރިން ބައިވެރިވެ ވަޑައިގެންނެވިއެވެ.
އިވެންޓް ނިންމާލުމުގެ ގޮތުން، މުބާރާތުން ވަނަތައް ހޯދި ދެ ކުޅުންތެރިން ކަމުގައިވާ ޒަމީލާއި އައިމަން ވަނީ އެފްސީ26 ގައި ޑެމޯ މެޗެއް ކުޅެ، ވާދަވެރި ފުޓްބޯޅަ ގޭމިންގގެ ދެން ކުޅޭ ގޭމް، އީއޭއެފްސީ 26ގެ ފުރަތަމަ ތަޖުރިބާ ދައްކާލާފައެވެ. މިއީ ރާއްޖޭގެ އީސްޕޯޓްސް ދާއިރާއަށް ލިބިގެންދިޔަ ވަރަށް މުހިންމު ކުރިއެރުމެއް ކަމުގައި އުރިދޫއިން ވަނީ ފާހަގަކޮށްފައެވެ.
