ހޮނިހިރު ދުވަހުގެރޭ ދަންވަރު 3:30 ހާއިރު ހުޅުމާލޭގެ ދެވަނަ ފިޔަވަހީގެ ވިނަރެސް އަދި ހިޔާގެ ބައެއް ޓަވަރުތަކުންނާއި އެމްޕީއެލް ޓަވަރުތަކުން ވަނީ ކަރަންޓުގެ ޚިދުމަތް މެދުކެނޑިފައެވެ.
ސްޓެލްކޯއިން މައުލޫމާތު ދޭގޮތުގައި ކަރަންޓުގެ ޚިދުމަތް މެދުކެނޑުނީ ހުޅުމާލޭ ދެވަނަ ފިޔަވަހީގެ ސަބްސްޓޭޝަނަކަށް ބަޔަކު ގެއްލުންދޭން އުޅުމުގެ ތެރޭގައި ނެޓްވޯކް ފީޑަރގެ ބައެއް އޮފްވެގެންނެވެ.
" މިކަމާއި ގުޅިގެން މެދުކެނޑުނު ކަރަންޓުގެ ޚިދުމަތް އަނބުރާ ދެވިފައިވަނީ ފަތިހު 04:56 ހާއިރު. މި ދެންނެވި ސަބްސްޓޭޝަނަށް ގެއްލުންދިން މައްސަލަ ކަމާބެހޭ ފަރާތްތަކަށް ހުށައަޅާ މިފަދަ ހާދިސާތައް ތަކުރާރުވިޔަ ނުދިނުމަށް ކަމާބެހޭ ފަރާތްތަކުގެ ސަމާލުމަށް ގެނައުމަށް ދަނީ މަސައްކަތްކުރަމުން". ސްޓެލްކޯއިން ނެރުނު ނޫސްބަޔާނުގައި ބަޔާންކޮށްފައިވެއެވެ.
މުޖުތަމަޢުގެ ގިނަ ބަޔަކަށް ތަކުލީފަކަށްވާ، އަދި އަމިއްލަ ފުރާނައަށްވެސް ނުރައްކާތެރި މިފަދަ އަމަލުތައް ހިންގާ ފަރާތްތައް ހުއްޓުވުމަށާއި، ތަކުރާރުވިޔަ ނުދިނުމަށްޓަކައި މިފަދަ ކަންކަން ކުރާ ފަރާތްތަކުގެ މައުލޫމާތު ކަމާއިބެހޭ ފަރާތްތަކާއި ހިއްސާ ކުރަމުން ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ. އަދި މި ހާދިސާގެ ސަބަބުން ކަސްޓަމަރުންނަށް ދިމާވި ދަތިތަކަށް އެކުންފުނިން ވަނީ މަޢާފަށް އެދިފައެވެ.
