ނިންމުންތައް ނިންމާ ކޮންމެ މަރުހަލާއެއްގައިވެސް އަންހެނުންނާއި ޒުވާނުން ތަމްސީލުކުރާ މިންވަރު ވަރަށްބޮޑަށް އިތުރުކުރައްވައި، ގޮތް ނިންމުމުގެ ހުރިހާ މަރުހަލާއެއްގައިވެސް ގިނަ ބައެއްގެ އަޑުއެހުމަށް މި ސަރުކާރުން މަސައްކަތް ކުރައްވާނެ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ވިދާޅުވެފައެވެ.
ރައީސް މިގޮތަށް ވިދާޅުވީ، މިއަދު ފާހަގަކުރަމުންދާ ބައިނަލްއަޤްވާމީ ޑިމޮކްރަސީ ދުވަހުގެ މުނާސަބަތުގައި، ހިއްސާކުރެއްވި މެސެޖުގައެވެ.
ދިވެހިރާއްޖެއަކީ އެންމެ ކުދި ޤައުމުތަކުގައިވެސް ޑިމޮކްރަސީ ކުރިއަރާނެކަމުގެ ހެއްކެއްކަމުގައި ވިދާޅުވެ، ޙައްޤުތަކާއި މިނިވަންކަން ކުރިއެރުވުމުގައި ދިވެހިރާއްޖެ އަދާކުރާ ދައުރު ފާހަގަކުރައްވާފައިވެއެވެ. ދިވެހިރާއްޖޭގައި ޑިމޮކްރެސީ ކުރިއަރާ ގޮސްފައިވަނީ ރައްޔިތުންގެ ސާބިތުކަމާއި، އެއްބައިވަންތަކަމާއި، ޢަޒުމް ވަރުގަދަވުމުގެ ސަބަބުންކަމުގައިވެސް ވަނީ ފާހަގަކުރައްވާފައެވެ.
ވެރިކަން ހިންގުމުގެ ކޮންމެ ދާއިރާއެއްގައިވެސް، ރައްޔިތުންގެ އަޑު އުފުލައި، ރައްޔިތުންގެ އުންމީދުތައް ބަލައިގަނެ، އެ އުންމީދުތަކުގެ އަގު ވަޒަން ކުރުމަށް ދިވެހިރާއްޖެއިން އަބަދުވެސް މަސައްކަތް ކުރާނެ ކަމުގެ ޔަޤީންކަން ރައީސްގެ މެސެޖުގައި ވަނީ ދެއްވާފައެވެ.
" ޤައުމުގެ މުސްތަޤްބަލް ބައްޓަން ކުރުމުގައި އަންހެނުންނާއި ޒުވާނުން ތަމްސީލުކުރާ މިންވަރު އިތުރުކުރުމަށްޓަކައި، ޑިމޮކްރެޓިކް ނިޒާމުގެ ތެރެއިން ތަފާތު ބަދަލުތައް ގެނައުމަށް މި ސަރުކާރުން އެއްބާރުލުން ދޭނަން. މި ލަނޑުދަނޑިއަށް ވާސިލުވުމަށްޓަކާ، ހައްޤުތައް ހޯދުމަށް މަސައްކަތްކުރަމުންދާ ހުރިހާ ފަރާތްކަކާއެކު ރާއްޖެއިން ސާބިތުކަންމަތީ ދެމިއޮންނާނަން".
ވަކިން ޚާއްޞަކޮށް މިކަމުގައި ފަލަސްޠީނުގެ ރައްޔިތުން ކުރަމުންދާ މަސައްކަތުގައި ދިވެހިރާއްޖެ ބައިވެރިވާނެކަމުގެ ޔަޤީންކަން، ރައީސް ވަނީ ދެއްވާފައެވެ. އަދި، ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތަކުން ދައްކުވައިދެނީ، އިސްތިޤްލާލަށް ނުރައްކާވެފައިވާ ޤައުމުތަކަށް ކުރިމަތިވެފައިވާ ގޮންޖެހުންތައް ކަމަށާއި، ޑިމޮކްރަސީ ހަރުދަނާކަމާއެކު މިހާރުގެ ޖީލުތަކަށާއި، އަންނަން އޮތް ޖީލުތަކަށް ވާސިލުކޮށްދިނުމަށް ދިވެހިރާއްޖެއިން އަބަދުވެސް ސާބިތުކަންމަތީ ދެމިތިބޭނެކަމުގެ ޔަޤީންކަންވެސް ދެއްވިއެވެ.
ބައިނަލްއަޤްވާމީ ފެންވަރުގައި ޑިމޮކްރަސީ ދުވަހެއް ފާހަގަކުރުމަށް ޔުނައިޓަޑް ނޭޝަންސް ޖެނެރަލް އެސެމްބްލީއިން ނިންމެވީ 2007 ވަނަ އަހަރުއެވެ. އަދި ރަސްމީ ގޮތެއްގައި ފުރަތަމަ ފަހަރަށް، ބައިނަލްއަޤްވާމީ ފެންވަރުގައި ޑިމޮކްރަސީ ދުވަސް ފާހަގަކުރީ 15 ސެޕްޓެމްބަރ 2008 ގައެވެ.
