އާއިލާއަކީ ދުނިޔަވީ ހަޔާތުގެ މުޑުވަކެވެ. އާއިލާ ބަލިކަށިވެއްޖެނަމަ ދިރިއުޅުމުގެ ނިޒާމު ހަލާކުވެ މުޖުތަމަޢުން އިންސާނިއްޔަތުކަން ނެތިދާނެއެވެ. އާއިލާއަކީ ލޯތްބާއި އޯގާތެރިކަމުގެ މައްޗަށް ބިނާވެފައިވާ ޝަރުޢީ އަދި އިޖުތިމާޢީ ހިޔާވަހިކަމެކެވެ. ހަރުދަނާ އާއިލާއެއް ބިނާކުރުމަކީ މާތްﷲ ދެއްވި މި ބޮޑު ނިޢުމަތަށް ޝުކުރުކުރުމަށް އެޅޭ ފުރަތަމަ ބިންގަލެވެ.
ރަނގަޅު އާއިލާއެއް ބިނާކުރެވޭނީ އިސްލާމީ އަޤީދާގެ މަތީގައި މުޅި ދިރިއުޅުން އާރާސްތު ކުރެވިގެންނެވެ. އާއިލީ ބިނާގެ އެންމެ މުހިންމު ދެ ތަނބުކަމުގައިވާ މައިންބަފައިންނަކީ ތަޢުހީދާއި ތިމާއަށް ކޮންމެހެން ބޭނުންވާ ދީނީ ޢިލްމު އުނގެނި އެއަށް އަމަލުކުރާ ރިވެތި އަޚްލާގުގެ ވެރިބަޔަކަށް ވެގެންނެވެ. ދެމަފިރީން ކިބައިން ދަރީންނަށް ރިވެތި މިސާލު ދައްކައިގެންނެވެ.
ފަސާދަޔާއި މަގުފުރެދުމާއި ބައިބައިވުމާއި ހަމަނުޖެހުންތަކުން އިސްލާމީ އުންމަތް ސަލާމަތް ކުރުމަށްޓަކައި ހަރުދަނާ އަޤީދާގެ މަތީގައި ދަރީން ތަރުބިއްޔަތުކުރާން ވަރަށް ބޮޑު އިސްކަމެއް ވަނީ ދޭން ޖެހިފައެވެ. ދަރީންގެ ހިތްތަކުގައި އީމާންކަމުގެ އޮށް އިންދައި ތަޢުހީދުގެ ޢިލްމު އުނގަންނައިދިނުމަކީ ހަރުދަނާ ތަރުބިއްޔަތާއި ޢިލްމުތަކުގެ ކުރިބޯއްޓަށް ދަރީން ވާސިލު ކޮށްދިނުމަށްޓަކައި ހުޅުވޭނެ އަމާން ދޮރެކެވެ. އަޤީދާގެ ޢިލްމު ދަރީންނަށް އުނގަންނައިދިނުމަކީ ރަސޫލުބޭކަލުންނާއި ނަބީބޭކަލުންގެ އެންމެ އިސްވާޖިބުކަމުގައި ހައްދަވައިފައިވެއެވެ.
ހަރުދަނާ އާއިލާއެއް ބިނާކުރެވޭނީ ދީނާ ދުރު ފިކުރުތަކާއި އަމަލުތައް ގޭތެރޭގެ މާހައުލުން ނައްތައިލެވިގެންނެވެ. އޭގެތެރޭގައި ދީނުގައި އަންގަވައިފައިވާ މެދުމިނާ ދުރު ފިކުރުތަކާއި ދީނަށް ޢަމަލު ނުކުރުމާއި ދީނީ ޝިޢާރުތަކަށް މަލާމާތްކޮށް ހަޖޫޖެހުމާއި ދީނުގެ މައްޗަށް ޣީރަތްތެރިކަން ނެތުން ފަދަ ކަންކަން ހިމެނެއެވެ. މިކަންކަން އާއިލާގެ ތެރެއިން ނައްތައިލައި އިސްލާމް ދީނަކީ އަދުލުވެރި ދީންކަމާއި މި ދީނަކީ ދިރިއުޅުމުގެ ސީދާ މަގުކަން ދަރީންނަށް ވިސްނައިދީ ނަފުސުތަކުގައި މިކަންކަން ހަރުލައްވަން ވާނެއެވެ.
ރަނގަޅު އާއިލާއެއް ބިނާކުރެވޭނީ ދަރީން ފުރާވަރަށް އެރުމުން ހުރިހައި ކަމެއް ހުއްދަވީކަމަށް ހީކުރާ ހީކުރުންތައް ދޫކޮށްލައިގެންނެވެ. އުޅޭނެހައި ގޮތަކަށް އުޅޭން ދަރީން ދޫކޮށް ނުލައި، އިސްލާމީ ޝަރީޢަތުގައި ކަނޑައަޅުއްވައިފައިވާ އިމުން ބޭރުނުވެ ހަޔާތުގެ ބައިވެރިޔާ އިޚުތިޔާރުކުރުމަށް ދަރީންނަށް އިރުޝާދުދީގެންނެވެ. ރަނގަޅު އާއިލާއެއް ބިނާކުރެވޭނީ އިސްލާމީ އުސޫލުތަކުގެ މަތީގައި އާއިލާގެ އެންމެހައި މެމްބަރުންގެ އަމަލުތައް ބަހައްޓައިގެންނެވެ.
