މާތް ﷲ އިންސާނީ ނަސްލު ދުނިޔޭގައި ލެއްވެވީ އެއްވެސް މަޤްސަދެއް ނެތި ބޭކާރު ގޮތުގައެއް ނޫނެވެ. މާތް ﷲ ވަހީކުރައްވައިފައިވެއެވެ. މާނައީ " ހަމަކަށަވަރުން ތިމަރަސްކަލާންގެ ތިޔަބައިމީހުން ހެއްދެވީ ބޭކާރު ގޮތުގައި ކުޅިވަރަށްކަމަށާއި، ހަމަކަށަވަރުން ތިޔަބައިމީހުން ތިމަންރަސްކަލާނގެ ހަޟްރަތަށް ރުޖޫޢަ ނުކުރައްވާނެކަމަށް ތިޔަބައިމީހުން ފަހެ ހީކުޅައީހެއްޔެވެ؟ ކޮންމެ ހާލެއްގައިވެސް އިންސާނާއަށް އެންމެ މަސްލަހަތު ހުރި ގޮތް އެންމެ މޮޅަށް ދެނެވޮޑިގެންވަނީ އެއިންސާނާ ޚަލްޤުކުރެއްވި ޚާލިޤުވަންތަ ﷲ އެވެ. އެކަލާނގެ އިންސާނާގެ ހަޔާތް ބައްޓަންކުރަންވީ ހެޔޮމަގު ދެއްކެވުމަށްޓަކައި ނަބީބޭކަލުން ފޮނުއްވިއެވެ. އަދި މިއުންމަތުގެ ނަބިއްޔާ މުހައްމަދު ﷺ ފޮނުއްވީ ޤިޔާމަތަށް ދާންދެން ދެމި އޮންނާނެ ޝާމިލު ފުރިހަމަ ޝަރީޢަތަކާއިގެންނެވެ.
މިއަދު އިސްލާމީ އުންމަތަށް ހުޅުވިފައިވާ އެންމެ ފަހި ފުރުސަތަކީ މުސްލިމް ޒުވާނުން އިސްލާމްދީނާއި އިސްލާމީ ޝަރީޢަތާއި ގާތްކުރުމަށް ހުޅުވައިލެވިފައިވާ ފަހި ފުރުސަތެވެ. އިސްލާމީ ޝަރީޢަތުގެ ރިވެތިކަމާއި ފުރިހަމަކަމާއިމެދު އެ ޒުވާނުން ހޭލުންތެރިކުރުމުގެ ފަހި ފުރުސަތެވެ. އިސްލާމީ ޝަރީޢަތުގެ ރިވެތިކަމާއި ފުރިހަމަކަމަށް ބީރައްޓެހިވުމުގެ ސަބަބުން އަހަރެމެންގެ އަޤީދާއާއި އީމާންތެރިކަމުގެ ހަޤީޤީ ދުރު މަގުތަކަށް ބައެއް ޒުވާނުން ކަސިޔާރުވެއެވެ. މިކަމާމެދު މާޔޫސްވެފައި ތިބުމުގެ ބަދަލުގައި ރިވެތި ގޮތުގައި ނަސޭހަތްތެރިވެ އިލްމާއި ހިކުމަތާއި އޯގާތެރިކަމާއިއެކު އެޒުވާނުންނަށް ހެޔޮމަގަށް މަގުދައްކައިދޭން ޖެހެއެވެ. މިއީ މިއަދު ފަރުދީ ގޮތުން ކޮންމެ މުސްލިމަކުވެސް އުންމަތަށްޓަކައި އަދާކޮށްދޭން ޖެހޭ ވާޖިބެކެވެ.
އިސްލާމް ދީނުގެ އަދުއްވުން ޒަމާނީ އެކިއެކި ވަސީލަތްތަކުގެ އެހީގައި މުސްލިމުންނާއި އިސްލާމްދީނާ މެދު ދޮގުތައް ފަތުރައި ޝައްކުތައް އުފައްދައެވެ. ހިތާމައަކީ މިކަމުގެ ވިހަ އަސަރު އަހަރެމެންގެ ތަޢުލީމާއި ތަރުބިއްޔަތަށްވެސް ފޯރާކަމެވެ. ޅަދަރީންގެ ސިކުނޑިތައް ދޮވެވި އެކުދީން ފިޠުރަތުގެ މަގާ ދުރަށްދާކަމެވެ. މާދިއްޔަތަށްގޮސް ހުސްވެ އުންމަތުގެ މުސްތަޤުބަލު ބަނަވެ އަނދިރިވަމުންދާކަމެވެ.
އުންމަތުގެ މުސްތަޤުބަލު އުޖާލާވާނީ އިސްލާމީ ނިޒާމާ އެއްގޮތަށް މުޖުތަމަޢުގެ އެންމެހައި އަފުރާދުން ފުރިހަމަޔަށް ބައްޓަންވެގެންނެވެ. ޅަފަތުގައި އިސްލާމްދީނުގެ މަތިވެރި ޝިޢާރުތަކާއި ޝަރީޢަތުގެ ފުރިހަމަކަން ދަރީންގެ ހިތްތަކުގައި ބިންވަޅުނަގައިދީގެންނެވެ.
މުސްލިމުން އިސްލާމީ ޝަރީޢަތުގައި ސާބިތުވެ އެއްބައިވަންތަކަންމަތީ ތިބިއިރު އިސްލާމީ އުންމަތަކީ އާރާއި ބާރުހުރި ޢިއްޒަތްތެރި އުންމަތެކެވެ. މިއަދު މުސްލިމުން ބައިބައިވެ ބާރުނެތި ދުޝްމަނުންގެ ކުރިމަތީގައި ނިކަމެތިވުމުގެ ސަބަބަކީ އިސްލާމީ ތަޢުލީމާއި ދުރުވެ އިސްލާމީ ޝަރީޢަތާއި ބީރައްޓެހިވުމެވެ. އުންމަތުގެ ޢިއްޒަތާއި ޤަދަރު އަނބުރައި ލިބޭނީ ﷲ ގެ މަގަށް މީސްތަކުން އެނބުރުމުންނެވެ.
މުޖުތަމަޢުގައި ފެތުރެމުންދާ ދީނާ ދުރުކަންކަމާ މެދު އަހަރެމެން ހޭލުންތެރިވާން ވެއްޖެއެވެ. ދީނީ ތަޢުލީމަށް އިތުރު މުހިންމުކަމެއް ދޭން ވެއްޖެއެވެ. ދީނާއި ބީރައްޓެހި ސަގާފަތްތަކުން ދުރުހެލިވެ އިސްލާމީ ޝިޢާރުތަކާއި ސަގާފަތްތައް ދިރުވައި އާލާކުރާން ވެއްޖެއެވެ. މުޖުތަމަޢުގެ އެންމެހައި އަފްރާދުންނަކީ ހެޔޮ ކަންކަމަށް އަމުރުކުރާ ނުބައި ކަންކަން މަނާކުރާ ބަޔަކަށް ވާން ވެއްޖެއެވެ.
މައުލޫމާތު: ހުކުރު ޚުޠުބާ
