ނައިނާއަކީ އޭނާގެ މަންމައާއި ބައްޕަގެ ހުރި އެންމެ ހަގު ދަރިފުޅެވެ. ނައިނާގެ ދޮށްޓަށް އެ އާއިލާގައި އިތުރު ފިރިހެން ކުއްޖަކު ހުރެއެވެ. ނައިނާގެ ބޭބެ ފަދައިން ނައިނާއަކީ ވެސް އިންތިހާއަށް މަންމައާއި ބައްޕަގެ ބަސްއަހާ ކިޔަމަންތެރި ކުއްޖެކެވެ. އެހެންކަމުން އެ ދެމަފިރިން ވެސް އަދި އޭނާގެ ދޮށްޓަށް ހުރި ބޭބެ ވެސް ނައިނާ ދެކެ އިންތިހާއަށް ލޯބިވެއެވެ.
ނައިނާއަކީ ވަރަށް އަޚުލާޤު ރަނގަޅު ރިވެތި ސިފަތަކެއް ލިބިފައިވާ ކުއްޖެކެވެ. އޭގެ ތެރެއިން ވެސް ފާހަގަކޮށްލެވޭ އެންމެ ޚާއްޞަ ސިފައަކީ ނައިނާގެ ކިބައިގާ ހުންނަ ތެދުވެރިކަމާއި އަމާނާތްތެރިކަމުގެ ސިފައެވެ. ނައިނާގެ އަމާނާތްތެރިކަމާ މެދު އޭނާ ދަންނަ ހަމައެކަކު ވެސް ޝައްކެއް ނުކުރާނެއެވެ. ހަމައެއާއެކު ނައިނާއަކީ މީހުނަށް ވަރަށް ޤަދަރުކޮށް އިޙްތިރާމް ކުރަން ދަންނަ ވެސް ކުއްޖެކެވެ. އޭގެ ސަބަބުން ސްކޫލްގެ މުދައްރިސުންނާއި ވެރިންގެ އިތުރުން އަވަށްޓެރިން ވެސް ނައިނާ ދެކެ ނުހަނު ލޯބިވެއެވެ.
ނައިނާގެ މައިންބަފައިންނަކީ ރަށުގެ ތަނަވަސް ބައެއްނޫނެވެ. ވަރަށް އާދައިގެ ދިރިއުޅުމެއް އުޅޭ ބަޔެކެވެ. އެހެންކަމުން ނައިނާގެ އަތުގައި މި ޒަމާނުގެ ގިނަ ކުދިންގެ އަތުގައި ހުންނަ ފަދަ އަގު ބޮޑު ސާމާނުތަކެއް ނުހުރެއެވެ. ރީތި ހެދުންތަކާއި އަދި އަގު ބޮޑު ގަހަނާތަކެއް ވެސް ނުހުރެއެވެ. އެހެން ނަމަވެސް ނައިނާ އެކަމަކާ ދެރަވެގެން ޝަކުވާކޮށެއް ނޫޅެއެވެ. ނައިނާ ދެކޭ ގޮތުގައި އޭނާއަށް އޭނާގެ އާއިލާއިންނާއި އެހެން މީހުންގެ ފަރާތުން ލިބޭ ލޯބި އެ ހުރިހާ އެއްޗަކަށް ވުރެ އަގު ބޮޑެވެ. އަދި އޭނާގެ ލޯބިވާ މައިންބަފައިން އޭނާއަށް ހޯދައިދީފައި ހުންނަ ތަކެއްޗަކީ ކިތަންމެ އާދައިގެ އެއްޗަކަށް ވީ ނަމަވެސް އޭނާ ދެކެނީ އެއީ ވަރަށް އަގު ބޮޑު ތަކެތީގެ ގޮތުގައެވެ.
ނައިނާގެ 12 ވަނަ އުފަން ދުވަހުގެ ހަދިޔާއަކަށް އޭނާގެ ލޯބިވާ ބޭބެ ދިނީ އެކި ކުލަކުލައިގެ މިނާތަކުން ހަދާފައިވާ ފަށެކެވެ. ނައިނާއަށް އެފަށް ވަރަށް ރީތިވިއެވެ. އެއީ ވަރަށް އަގު ބޮޑު ފަށެއްގެ ގޮތުގައި ނައިނާއަށް ސިފަކުރެވުނެވެ. އެ ފަށް ހަދިޔާކުރުމުން ނައިނާ އޭނާގެ ބޭބެއަށް ވަރަށް ބޮޑަށް ޝުކުރު އަދާކުރިއެވެ. ނައިނާ އެ ފަށް ދެކެ ވަރަށް ލޯބިވެއެވެ. އޭގެ ފަހުން ސްކޫލަށް ދާއިރު ފިޔަވައި އެހެން ހުރިހާ ވަގުތެއްގައި ނައިނާ ހުންނަނީ އެ ފަށް އަޅައިގެންނެވެ. އެކަމާ ނައިނާގެ ބައެއް އެކުވެރިން ދިމާކޮށް ވެސް ހަދައެވެ. އެ ކުދިން ބުނެއުޅެއެވެ. ތިޔައީ މާ ކުޑަ ކުދިން އަޅާ ކަހަލަ އަދައިގެ މިނާ ފަށެއް ނޫން ހެއްޔެވެ؟ ތަންކޮޅެއް ރީތި ޑިޒައިނެއްގެ ފަށެއް ނާޅަނީ ކީއްވެ ހެއްޔެވެ؟ ތިޔަ ފަށަށް ވުރެ ރަން ފަށް މާ ރީތި ވާނެއެވެ. އެ ބަސްތަކަށް ރައްދުދޭ ފަހަރުފަހަރު ނައިނާ އެ ކުދިންނަށް ބުނެއެވެ. މި ފަށް މަށަށް ވަރަށް ރީއްޗެވެ. އަހަރެންނަށް މި އަށް ވުރެ ވަކިން ރީތި މޮޅު ފަށެއް ދުވަހަކު ވެސް ލިބޭނެއެކޭ ހީއެއް ނުވެއެވެ. އަދި ބުނެއެވެ. ތިޔަ ކުދިންނަށް އެނގޭ ހެއްޔެވެ؟ މި ފަށް މަށަށް ހަދިޔާކުރީ އަހަރެންގެ ލޯބިވާ ބޭބެއެވެ. އެހެން ވީމާ ވެސް އަހަރެން މި ފަށް ދެކެ ވަރަށް ލޯބިވެއެވެ. ދެން އެ ކުދިން ބަސްހުއްޓިފައި މަޑުމަޑުން ތިބެއެވެ.
ހޮނިހިރު ދުވަހެއްގެ މެންދުރުގެ ވަގުތެވެ. އެ ދުވަހަކީ ސްކޫލްގެ އެއްވެސް އިތުރު ޙަރަކާތެއް ވެސް އޮތް ދުވަހެއް ނޫނެވެ. ނައިނާ މެންދުރު ކައިގެން ނަމާދު ކޮށް ނިމުނު ތަނާ އޭނާގެ އެކުވެރިންތަކެއް އެ ގެއަށް އަތުވެއްޖެއެވެ. އެ މީހުން ބުންޏެވެ. "ނައިނާ ހިނގާ މޫދަށް ދާން! އަހަރެމެން މިދަނީ މޫދަށް. މިއަދުގެ ދިޔަވަރު ވަރަށް ބޮޑު. ވަރަށް މަޖާވާނެ." ނައިނާ ވެސް ހުރީ މޫދަށް ދާހިތުންނެވެ. އެހެންކަމުން އޭނާގެ އެކުވެރިން އެހެން ބުނުމާއެކު މޫދަށް ދިއުމުގެ ހުއްދަ މަންމަ ގާތުން ހޯދައިގެން އެ ކުދިންނާ އެކު ހިގައްޖެއެވެ. އެ ދުވަހު މޫދުގައި ނައިނާ ވެސް އެއްފުރާގެ ކުދިންނާއެކު ކުޅެ ވަރަށް މަޖާކުރިއެވެ.
ދެ ގަޑިއެއް ހާއިރު މޫދުގައި އުޅުމަށްފަހު އެ ކުދިން އެއްގަމަށް އެރިއެވެ. އަދި އެއްގަމަށް އެރުމަށް ފަހު ވެސް އެ ކުދިން އަތިރިމަތީގައި ހީ ސަމާސާކޮށް މަޖާކުރަން އުޅުނެވެ. އިރުކޮޅަކުން ކުއްލިއަކަށް ނައިނާ ކަރުގައި އަތްކާތާމުން ހާސްވެގެން ތަންތަން ހޯދަން ފެށިއެވެ. އަދި ބުންޏެވެ. އަހަރެންގެ ފަށް ކޮބައި ހެއްޔެވެ؟ އެ ވަގުތު ހުރިހާ ކުދިން ނައިނާގެ ކަރަށް ބަލައިލިއެވެ. އެ ބުނާހެން ނައިނާގެ ފަށެއް އޭނާގެ ކަރުގައެއް ނެތެވެ. އެ ވަގުތު އެތަނުން ކުއްޖަކު ބުންޏެވެ. "ނައިނާ މޫދަށް އެރުނީ ފަށް އަޅައިގެންތަ؟" އެހެން ކުއްޖަކު ބުންޏެވެ. "މަށަށް ހީވަނީ މޫދަށް އެރުނުއިރު ނައިނާގެ ކަރުގައި ފަށް އޮތްހެން." ނައިނާ ވަރަށް ދެރަވެގެން ރޯންފެށިއެވެ. ދެން ހުރިހާ ކުދިން ނައިނާއަށް ހިތްވަރުދީ ރުއިން ހުއްޓުވޭތޯ މަސައްކަތް ކުރަން ފެށިއެވެ. އަދި ހުރިހާ ކުދިން ނައިނާގެ ފަށް ފެނޭތޯ އަތިރިމަތީ އެ ސަރަހައްދު ހޯދަންފެށިއެވެ. އަދި ބައެއް ކުދިން މޫދަށް އެރިގެން އެ ކުދިން އުޅުނު ހިސާބު ވެސް ހޯދަމުންދިޔައެވެ. ނައިނާ ވެސް އެ ކުދިންނާ އެކު ފަށް ހޯދަމުން ދިޔައެވެ.
އެ ދުވަހު ވަރަށް ގިނަ އިރުވަންދެން އެކުވެރިންނާއި ނައިނާ، ގެއްލުނު ފަށް ފެނޭތޯ ކުރި މަސައްކަތް ވީ ނާކާމިޔާބެވެ. ދެން ވަރަށް ދެރަވެ ހިތާމަކުރަމުން އަސުރު ނަމާދު ވަގުތު ޖެހޭތީ އެ ކުދިން އެއްގަމަށް އެރިއެވެ. ފުރަތަމަ ހުރިހާ ކުދިން ދިޔައީ ނައިނާގެ ގެއަށެވެ. ގެއަށް ގޮސް ނައިނާގެ މަންމައަށް ކަންވީގޮތް ކިޔައިދީފައި އަދި ފަހުން ފަށް ފެނޭތޯ ދާނެކަމަށް ބުނަމުން އެ ކުދިންގެ ގެއަށް ހިނގައްޖެއެވެ. އެ ވަގުތު ވެސް ނައިނާ ހުރީ ރޮވިފައެވެ. މަންމަ ނައިނާއަށް ހިތްވަރުދިނެވެ. މަންމަ ބުންޏެވެ. ދަރިފުޅާއެވެ. ކޮންމެ ކަމެއް ވެސް ވާނީ އެންމެ ރަނގަޅަކަށެވެ. ތިޔަ ފަށް އަދި ފެނި ވެސް ދާނެއެވެ. އަދި ތިޔަ ފަށުގެ ބަދަލުގައި ދަރިފުޅަށް މާ ރީތި މޮޅު ފަށެއް ވެސް ލިބިދާނެއެވެ. ހިތްވަރުކޮށްފައި ފަށް ފެނޭތޯ ގިނައިން ދުޢާ ކުރަމުން ހޯދަން މަސައްކަތް ކުރާނީއެވެ. ކޮންމެ ނަމާދެއްގެ ފަހުގައި ވެސް ދުޢާ ކުރާށެވެ. ﷲއީ ކުޅަދުންވަންތަ ރަސްކަލާންގެއެވެ. ﷲ އިރާދަފުޅުން ތިޔަފަށް ދަރިފުޅަށް ލިބޭނެއެވެ. ދެން ނައިނާ މަންމަ ބުނި ފަދައިން އެ ދުވަހާއި އެރޭގެ ކޮންމެ ނަމާދަކަށް ފަހު އޭނާގެ ލޯބިވާ ފަށް އޭނާއަށް އަނބުރާ ލިބޭތޯ ދުޢާ ކުރަންފެށިއެވެ. އަދި އެރޭ ނައިނާ ނުނިދިފައި ފުރޮޅިފުރޮޅި އެތައް އިރަކު އޮތެވެ. އޭނާއަށް ނިދުނީ ކިހާއިރަކުކަމެއް ވެސް އޭނާއަކަށް ނޭނގެއެވެ.
ޖެހިގެން އައި ދުވަހަކީ ހުކުރު ދުވަހެވެ. އެ ދުވަހު ވަރަށް ހެނދުނުހެނދުނާ ނައިނާ އޭނާގެ ފަށް ގެއްލުނު ދިމާ އަތިރިމައްޗަށް، ފަށް ފެނޭތޯ ދިޔައެވެ. އެއީ ވަރަށް ހެނދުނުގެ ވަގުތެއްކަމުން އަތިރިމަތީގައި އެއްވެސް މީހަކު ފެންނާކަށް ނެތެވެ. ނައިނާ ފަށް ފެނޭތޯ ހޯދަމުން ހޯދަމުން ދަނިކޮށް، ކުއްލިއަކަށް މީހަކު ގޮވައިލި އަޑު ނައިނާއަށް އިވުނެވެ. "ނައިނާ ތިޔަ ހޯދަނީ ކޮންއެއްޗެއް ތަ؟" އެ އަޑު އައި ދިމާއަށް ނައިނާ ބަލައިލުމާ އެކު ދިޔައީ ސިއްސައިގެންނެވެ. ނައިނާއަށް ފެނުނީ އޭނާގެ ކުރިމަތިން މޫދު ތެރޭގައި އިން ވަރަށް ރީތި އަންހެނެކެވެ. އޭނާ އިނީ ނައިނާއާ ދިމާއަށް ބަލަހައްޓައިގެން ހެވިލާފައެވެ. ބޮޑަށް ވައްތަރީ ވާހަކަ ފޮތްތަކުގައި ސިފަކޮށްދީފައި ހުންނަ ކަހަލަ ޕަރީއަކާއެވެ. ނައިނާއަށް ކުއްލިއަކަށް ބުނެވުނެވެ. "މި ހޯދަނީ އިއްޔެ މިތަނަށް ގެއްލުނު އަޅުގަނޑުގެ ފަށް. އެއީ އަޅުގަނޑު ވަރަށް ބޭނުން ފަށެއް. އެ ފަށް ފެނޭތޯ އައިސްގެން މި އުޅެނީ." އެހެން ބުނެވުނު އިރު ވެސް ނައިނާ ހުރީ ފެންކަޅިވެފައެވެ.
ޕަރީ ބުންޏެވެ. "ނައިނާ ތިޔަ ފަށް ޕަރީ ދައްތަ ހޯދައިދޭނަން. އިންޝާﷲ"
ދެން ޕަރީ އެ ދިމާ މޫދުގެ އަޑިއަށް އަތް ކޮށްޕާލައިގެން އިރުކޮޅަކު އުޅެލުމަށް ފަހު އަތް ނެގި އިރު އަތު ތެރޭގައި އޮތީ ރިހި ކުލައިގެ ރީތި ފަށެކެވެ. ނައިނާއަށް އެ ފަށް ފެނުމުން އެ ފަށާ ދިމާއަށް ބަލަން ހުއްޓެވެ. ޕަރީ ދައްތަ އެ ފަށް ނައިނާއަށް ދިއްކޮށްލަމުން ބުންޏެވެ. "މިއީ ދޯ ނައިނާ ތި ގެއްލިގެން އުޅޭ ފަށަކީ" ނައިނާ އެ ފަށަށް ބަލައިލައިފައި ވަގުތުން ނޫނެކޭ ބުނުމުގެ ގޮތުން ބޯ ހޫރައިލަމުން ބުންޏެވެ.
ދެން ޕަރީ ދައްތަ އަނެއްކާ ވެސް މޫދު ތެރެއަށް އަތްކޮށްޕާލިއެވެ. މިފަހަރު ނެގީ ވިދަވިދާ އޮތް ވަރަށް ރީތި ފަށެކެވެ. ނައިނާގެ ދެ ލޯ ބޮޑުވެގެން ދިޔައެވެ. އެއީ ހާދަ ރީތި ފަށެކޭ އެ ވަގުތު ނައިނާގެ ހިތަށް އެރިއެވެ. ޕަރީ އެ ވިދަވިދާ އޮތް ފަށް ނައިނާއަށް ދިއްކޮށްލިއެވެ. އަދި ބުންޏެވެ.
ޕަރީ: "މިއޮތީއެއްނު ނައިނާގެ ފަށް"
މިފަހަރު ވެސް ދެރަވެލާފައި ނައިނާ ބޯ ހޫރާލަމުން ބުންޏެވެ.
ނައިނާ: ތިޔައީ ވެސް އަޅުގަނޑުގެ ފަށެއް ނޫން!" އެހެން ބުނަމުން ނައިނާ ދެރަވެގެން ދުރަށް ދާން ހިނގައިގަތެވެ. އެ ވަގުތު ޕަރީ ބާރަށް ގޮވައިލިއެވެ.
ޕަރީ: "މަޑު ކޮށްބަލަ ނައިނާ! އަދި ވެސް ތިޔަ ފަށް ފެނިދާނެޔޭ. އަދި މަޑުކޮށްލަބަލަ"
ނައިނާ އަނެއްކާ ވެސް ޕަރީ ދައްތަ ގާތަށް ގޮސް ހުއްޓިއްޖެއެވެ. ތިން ވަނަ ފަހަރު ޕަރީ މޫދުތެރެއަށް އަތް ކޮށްޕާލާފައި އެއްޗެއް އަތު ނުޖެހިގެން އިރުކޮޅަކު އުޅުމަށް ފަހު މޫދުތެރެއިން އެއްޗެއް ނަގައި ނައިނާއަށް ދިއްކޮށްލިއެވެ. މި ފަހަރު ނެގި ފަށް ހަމަ ފެނުމާ އެކު ނައިނާ އުފަލުން ބުންޏެވެ.
ނައިނާ: "ތިޔައީ އަޅުގަނޑުގެ ފަށް. ތިޔަ މިނާ ފަށަކީ އަޅުގަނޑުގެ ފަށް. ތިޔައީ އަޅުގަނޑުގެ ބޭބެ އަޅުގަނޑަށް ދިން ހަދިޔާ."
ނައިނާ ޕަރީ ދިއްކޮށްލި ފަށުގައި ހިފަމުން ޕަރީދައްތައަށް ޝުކުރު އަދާކުރިއެވެ. އެ ވަގުތު ޕަރީ ހެވިފައި ނައިނާއަށް ބަލަން ހުއްޓެވެ. އަދި ބުންޏެވެ.
ޕަރީ: ނައިނާގެ ކިބައިގާ ތިޔަ ހުރި ތެދުވެރިކަމަށްޓަކައި ޕަރީ ދައްތަ ވަރަށް އުފާ ވެއްޖެ. އަދި އެކަމުގެ އިނާމެއްގެ ގޮތުން މި ދެ ފަށް ވެސް ޕަރީ ދައްތަ ނައިނާއަށް ހަދިޔާއަކަށް މި ދެނީ މިއީ ރަން ފަށަކާއި ރިހި ފަށެއް. މި ދެ ފަށް ވެސް ގެންދޭ"
ނައިނާ: (ވީ އުފަލުން ވަރަށް ބާރަށް) ޝުކުރިއްޔާ ޕަރީ ދައްތާ" މިހެން ބުނެލެވުނީ ވަރަށް ބާރަށެވެ. އެ އަޑަށް ނައިނާގެ މަންމަ ދުވެފައި އައިސް ދަރިފުޅާ ދަރިފުޅާ ތިޔަ ވާހަކަދައްކަނީ ކާކާތަ؟ މިހެން ބުނަމުން ނައިނާގެ ގައިގައި އަތްލާ ތަޅުވައިލިއެވެ. ކުއްލިއަކަށް ނައިނާ ދެލޯ ހުޅުވައިލުމާ އެކު ވަށައިގެން ހޯދަންފެށިއެވެ. އެ ވަގުތު މަންމަ ބުންޏެވެ.
މަންމަ: ދަރިފުޅަށް ކިހިނެއްވީތަ؟ ތިޔަ ހޯދަނީ ކޮންއެއްޗެއްތަ؟ ހުވަފެނެއް ފެނުނީތަ؟
ނައިނާ އޭނާގެ މަންމައަށް އޭނާއަށް ފެނުނު ހުވަފެން ކިޔައިދިނެވެ. ދެން މަންމަ ބުންޏެވެ.
މަންމަ: ދަރިފުޅު އެ ކަމާމެދު ވިސްނާ ވަރުން ހުވަފެނުން ވެސް ތި ފެނުނީ. އިރާދަކުރެއްވިއްޔާ ލަސްތަކެއްނުވެ ދަރިފުޅުގެ ތިޔަފަށް ދަރިފުޅަށް ލިބޭނެގޮތް ﷲ މެދުވެރިކުރައްވާނެ.
އޭރު ފަތިސް ނަމާދަށް ބަންގި ވެސް ގޮވައިފިއެވެ. އެހެންކަމުން ނައިނާ މަންމައާ އެކު ފަތިސް ނަމާދު ކުރުމަށް ފަހު ދެމައިން ހެނދުނު ސައި ތައްޔާރުކުރަން ބަދިގެއަށް ވަދެއްޖެއެވެ. އެ ދެމައިން މަސައްކަތުގައި އުޅެނިކޮށް މީހަކު ސަލާމްގޮވައިލި އަޑު އިވިއްޖެއެވެ. ދެން ނައިނާ ބޭރު ބަލައިލިއެވެ. އެ ވަގުތު ދޮރުމަތީގައި ހުރީ ނައިނާގެ ސްކޫލް ކުއްޖެއް ކަމަށްވާ ނަދާއެވެ. އަދި އޭނާގެ ފަހަތުގައި އެ ރަށަށް އައިސް އުޅޭ ފަތުރުވެރިއަކު ހުއްޓެވެ. ނައިނާއަށް އެ ފަތުރުވެރިޔާ ފެނުމުން ކުއްލިއަކަށް ހަނދާނަށް އައީ އޭނާއަށް ރޭގައި ފެނުނު ހުވަފެނުގައި އުޅުނު ޕަރީ ދައްތަމަތިންނެވެ.
ނަދާ: މީނާ މި އައީ އަތިރިމަތިން ފެނުނު އެއްޗެއް އެއީ ނައިނާގެ އެއްޗެއްކަމަށް ބަޔަކު ބުނެގެން އެ ނައިނާއަށް ރައްދުކޮށްދޭން.
މިހެން ބުނެފައި ނަދާ އެ ފަތުރުވެރިޔާއަށް ބަލައިލިއެވެ. ދެން ފަތުރުވެރިޔާ ކުރިޔަށް ޖެހިލާފައި އޭނާގެ އަތުގައި ވިދަވިދާ އޮތް ވަރަށް ރީތި ފަލަ ފަށެއް ނައިނާއަށް ދިއްކޮށްލިއެވެ. ނައިނާއަށް ހުރެވުނީ އެ ފަށް ފެނިފައި އެ ފަށް ވިދާވަރުންނާއި އޭގެ ރީތިކަމުން ދެލޯ ބޮޑުވެ ބަސްހުއްޓިފައެވެ.
ފަތުރުވެރިޔާ: މިއޮތީ ނައިނާގެ ފަށް. އަހަރެން އިރުއަރާ މަންޒަރު ބަލަން މި ރަށުގެ އަތިރިމައްޗަށް ގޮސް އުޅެނިކޮށް މި ފަށް ގޮނޑުދޮށުން ފެނުނީ. އެތާ ތިބި ކުދިންތަކަކަށް ފަށް ދެއްކީމާ ބުނީ ތިޔައީ
ނައިނާ ގެއްލިގެން އުޅޭ ފަށެކޭ. ދެން އަހަރެން މި ކުއްޖާ ގޮވައިގެން މިއައީ ނައިނާއަށް މި ފަށް ރައްދުކޮށްދޭން.
ނައިނާ: (ނައިނާ ފަށާދިމާއަށް ބަލަންހުރެފައި) ތީ އަޅުގަނޑުގެ ފަށެއް ނޫން. އަޅުގަނޑު ގެއްލިގެން މިއުޅެނީ މިނާފަށެއް.
އެވަގުތު އެއްކަލަ ފަތުރުވެރިޔާ ނައިނާގެ އަސްލު ފަށް އޭނާގެ ދަބަހުން ނަގާފައި ނައިނާއަށް ދިއްކޮށްލިއެވެ. ނައިނާ އުފަލުން އަވަސްއަވަހަށް ފަށުގައި ހިފިއެވެ. އަދި ވަރަށް ބޮޑަށް އެ ދެ މީހުނަށް ޝުކުރުއަދާކޮށްފައި ހެނދުނުގެ ސަޔަށް ދެ މީހުނަށް ދަޢުވަތު ދިނެވެ.
ފަތުރުވެރިޔާ: މިއަދަކުނޫން! އެހެން ދުވަހަކުން އަދި މިގެއަށް އަންނަން ވެސް ބޭނުން.
ދެން އެ ދެ މީހުނަށް ޝުކުރު އަދާކޮށްފައި، އަނެއްކާ ވެސް ނައިނާ މަންމަ ގާތަށް ބަދިގެއާ ދިމާއަށް ހިނގައިގަތެވެ. އެ ވަގުތު ފަތުރުވެރިޔާ ގޮވައިލިއެވެ."
ފަތުރުވެރިޔާ: "ނައިނާ އިހަށް މަޑުކޮށްލަބަލަ!" ނައިނާ ވަރަށް އަދަބުވެރިކަމާ އެކު ގޮސް ފަތުރުވެރިޔާގެ ކުރިމަތީގައި ހުއްޓިއްޖެއެވެ. ދެން ފަތުރުވެރިޔާގެ އަތުގައި ވިދަވިދާ އޮތް ރީތި ފަށް ނައިނާއަށް ދިއްކޮށްލަމުން ބުންޏެވެ.
ފަތުރުވެރިޔާ: މީ އަހަރެން ނައިނާއަށް ދޭ ހަދިޔާއެއް. މީގައި ހިފާ. ތިޔައީ ވަރަށް ތެދުވެރި ކުއްޖެއްކަން އަހަރެންނަށް އެނގިއްޖެ. އެއީ ވަރަށް ރަނގަޅު ސިފައެއް. މިހާރުގެ ކުދިންގެ ކިބައިން ނުފެންނަ ރީތި ސިފައެއް. އޭގެ އިނާމެއްގެ ގޮތުން މި ރަން ފަށް އަހަރެން ނައިނާއަށް މި ހަދިޔާކުރަނީ.
ނައިނާ ފަސްޖެހި ބަސްހުއްޓިފައި ފަތުރުވެރިޔާއާ ދިމާއަށް ޙައިރާންކަމާއެކު ބަލަން ހުއްޓެވެ.
ފަތުރުވެރިޔާ: މީގައި ހިފާ. މީ އަހަރެން ނައިނާއަށް ހަމަ ލޯބިން ދޭ ހަދިޔާއެއް. ނައިނާ އަކީ މަދުން ނޫނީ ނުފެންނަފަދަ ތެދުވެރި ކުއްޖެއް. ތިޔަފަދަ ތެދުވެރި ކުދިން މިޒަމާނުގައި ވަރަށް މަދުވާނެ. އެކަން އަހަރެން ފާހަގަކުރަން ބޭނުން.
ފަތުރުވެރިޔާ އެހެން ބުނުމުން ނައިނާ ހުރީ ވަރަށް އުފާވެފައެވެ. އެއީ ބޭރު މީހެއްގެ އަނގައިން ނަމަވެސް އޭނާއަށް އެފަދަ ހެޔޮ ބަސްތަކެއް އިވިގެންދިޔަކަމަށް ޓަކައެވެ. އަދި އެދިން އަގުބޮޑު ހަދިޔާއަށްޓަކައި ވެސް ހުރީ އުފާވެފައެވެ. ދެން ނައިނާ ހީލާފައި ބުންޏެވެ. "ވަރަށް ބޮޑަށް ޝުކުރިއްޔާ! ތިޔަ ހާމަކުރެއްވި ތައުރީފުގެ ބަސްކޮޅަށާއި އަދި ދެއްވި އަގު ބޮޑު މި ހަދިޔާއަށްޓަކައި ވަރަށް ބޮޑަށް ޝުކުރިއްޔާ!"
ނައިނާ ދުވެފައި ގޮސް އޭނާގެ މަންމަ ގާތުގައި އޭނާ ލޯބިވާ ފަށް ލިބިއްޖެ ވާހަކައާއި އަދި ލިބުނު އަޑު ބޮޑު ހަދިޔާގެ ވާހަކަ ބުނެފިއެވެ. ނައިނާގެ މަންމަ ވީ އުފަލުން ރޮވިއްޖެއެވެ. އަދި މަންމަ ބުންޏެވެ.
މަންމަ: މަންމަ ހުރީ ތިޔަ ހުރިހާކަމެއް ފެނި އަޑުއިވޭ ހިސާބުގައި. ދަރިފުޅާ މެދު މަންމަ ފަޚުރުވެރިވޭ.
ދަރިފުޅަކީ މައިންބަފައިންގެ ބަސްއަހާ، ތެދުވެރި އަމާނާތްތެރި ދީނީކަންކަމަށް ލޯބިކުރާ އަދި ރަހިމުގެ ގުޅުން ދަމަހަށްޓާ ކުއްޖެއް. އެހެންކަމުން ﷲ ދަރިފުޅަށް ދެރަގޮތެއް މެދުވެރި ނުކުރައްވާނެއޭ މަންމަގެ ހިތުގައި އަބަދުވެސް އޮވޭ. މަންމަގެ ދުޢާއަކީ އަބަދުވެސް ތިޔަ ގޮތުގައި ދަރިފުޅު ސާބިތުވެ ހުރުން. އޭރުން ﷲގެ ލޯތްބާއި ރައްކާތެރިކަން އަބަދުވެސް ދަރިފުޅަށް ލިބިލިބި ހުންނާނެ.
ޢިބްރަތް: ތެދުވެރިކަމުގެ ނަތީޖާ ފޮނިވާނެއެވެ.
ނޯޓް: ޙުސްނާ ފަހްމީ (ހުސްނާ މިސް) އަކީ، ރާއްޖޭގެ ތަޢުލީމީ ދާއިރާގައި 42 އަހަރަށް ވުރެ ގިނަ ދުވަހު އިޚުލާޞްތެރި ޚިދުމަތްތަކެއް ކުރައްވާފައިވާ ކަނބަލެކެވެ. އަދި މެދުނުކެނޑި 37 އަހަރަށް ވުރެ ގިނަ ދުވަހު ދިވެހި ދައުލަތައް ޚިދުމަތްކުރައްވާފައި ވާތީ، ރައިސުލްޖުމްހޫރިއްޔާ ދެއްވާ ދައުލަތަށް ގިނަ ދުވަހު ޚިދުމަތް ކުރުމުގެ އިނާމު 2021 ވަނަ ލިބިވަޑައިގަތުމާއެކު 2023 ވަނަ އަހަރު ރެހެންދި އެވޯޑް ލިބިވަޑައިގެންފައިވެއެވެ. ޙުސްނާ ފަހްމީ "އަރާކުރި" ސީރީސް ގެ ނަމުގައި ދިވެހިބަހުގެ ހަތަރު ހުނަރަށް އަމާޒުކުރައްވައިގެން ނާސަރީ ކުދިންނަށް ޚާއްޞަ ދިވެހިބަހުގެ އަކުރުތަކާއި ފިލިތަކާއި ސުކުންތައް ދަސްކޮށްދޭ ފޮތްތަކުން ފެށިގެން ޕްރައިމަރީ އަދި މެދުމަދަރުސީ ގްރޭޑްތަކުގެ ކުދިންނަށް ޚާއްޞަކޮށްގެން ޢިބްރަތްތެރި އަދި މަޖާ ކުރު ވާހަކަތަކާއި، މަސައްކަތު ފޮތްތަކާއި، ވާހަކަ ދޭހައާއި ކިޔުމުގެ ދޭހައިގެ ފޮތްތަކުގެ އިތުރުން އުފެއްދުންތެރި ލިޔުމުގެ ފޮތްތައް ހިމެނޭނެހެން 40 ފޮތެއް މިހާތަނަށް ނެރެ އާންމުކުރައްވާފައިވެއެވެ.
