ދަރިވަރުންނަށް ސްކޫލު ބަންދުވީއެވެ. އެއްތަނެއްގައި ގިނަވަގުތު ތިބެން ޖެހުމުން ފޫހިވެ ރުޅިގަދަކުރާ ކުދިން އުޅެއެވެ. ހަމަހިމޭން ވަގުތުކޮޅެއް ނުވަތަ ކުދިންގެ އަމިއްލަ ވަގުތުކޮޅެއް ކުދިންނަށް ދިނުމަކީ ވަރަށް މުހިންމުކަމެކެވެ.
ހަމަހިމޭން ވަގުތުކޮޅަކީ ކޮބާ؟
ކޮންމެ ދުވަހަކުވެސް ކުދިންގެ އަމިއްލަ ހަމަހިމޭން ވަކި ޚާއްސަ ވަގުތުކޮޅެއް ހަމަޖެއްސިދާނެއެވެ. އެވަގުތުކޮޅު ވާންވާނީ ޓެބްލެޓް އަދި ޓީވީއާއި ދުރުވެ އެކުދިންގެ ހިތްހަމަޖެހުމަށް ޚާއްސަ ވަގުތުކޮޅަކަށެވެ. އަޑުމަޑުކޮށްގެން ކަންކަމާއި ވިސްނާލުމުގެ ފުރުސަތު އެކުދިންނަށް ލިބޭނެއެވެ. ހަމަހިމޭން ވަގުތުކޮޅު 30 މިނިޓަށްވެސް ހެދިދާނެއެވެ. އަދި ޓައިމާއެއް ސެޓްކުރެވިދާނެއެވެ. އެއިރުން އެކުދިން އަމިއްލައަށް އެ ވަގުތުކޮޅު ނިމުމުން އެނގޭނެއެވެ. އެއްކުއްޖަކަށްވުރެ ގިނަ ކުދިން ތިބޭނަމަ ހަމަހިމޭން ވަގުތުކޮޅު ހޭދަކުރުމަށް ދެތަނެއް ކަނޑައަޅަންވާނެއެވެ. އެހެންނޫނީ އެއްކުއްޖަކު އަނެއްކުއްޖަކަށް ސަކަރާތްޖަހާ އެވަގުތުކޮޅުގެ ބޭނުން އެންމެ އެކަށޭނަ ގޮތަކަށް ނުހިފިދާނެއެވެ. ހަމަހިމޭން ވަގުތުކޮޅުގައި ފޮތަކާއި ފަންސުރެއްވެސް ދެވިދާނެއެވެ. ބައެއް ކުދިން މިގޮތަށްދޭ ހަމަހިމޭން ވަގުތުގައި ފޮތުގައި ބޭނުންވާ ކަންތައްތައް ލިޔެލާ ކުރަހާ އުޅެއެވެ. އަދި ބައެއް ކުދިން އެކުދިން އެންމެ ގަޔާވާ ފޮތެއް ކިޔުމުގައި ވަގުތު ހޭދަކުރެއެވެ. އެކަމަކު ފޮތް ދޭނީވެސް އެކުދިން ބޭނުންވާނަމައެވެ.
ހަމަހިމޭން ވަގުތުކޮޅު އަލަށް ތަޢާރަފްކުރާނެ ގޮތް:
ކޮންމެ ދުވަހަކު ކުރާނެ ކަންތައްތައް އެނގޭނެ ގޮތަށް ޝެޑިއުލެއް ހަދާފަވާނަމަ ކުދިންނަށް ފަސޭހަވާނެއެވެ. ފުރަތަމަ ދުވަހު 10 މިނިޓް އަދި ދެވަނަ ދުވަހު 15 މިނިޓް މިގޮތަށް ވަގުތު އިތުރު ކުރެވިދާނެއެވެ. އެއިރުން އެކުދިންގެ ހަމަހިމޭން ވަގުތުކޮޅު އަންނާނީ ކޮންއިރަކުކަން އެނގޭނެއެވެ. އަދި ކުދިންނަށް މި ހަމަހިމޭން ވަގުތުކޮޅުގެ މުހިންމުކަން ބުނެދެވިދާނެއެވެ. ޝައުގުވެރިކަމާއެކު އެވަގުތުކޮޅުގެ ބޭނުން އެކުދިން ހިފާނެއެވެ.
ހަމަހިމޭން ވަގުތުކޮޅުގެ ފައިދާ
ޝެޑިއުލްކޮށްގެން ކޮންމެ ދުވަހަކު ދެވޭ ހަމަހިމޭން ވަގުތުކޮޅުގެ ސަބަބުން ކުދިންނަށް ކަންކަމާއިމެދު ވިސްނާ ފިކުރުކުރުމަށް ފުރުސަތު ލިބެއެވެ. އެހެންނޫނީ އަބަދު ގޭމް ކުޅުމާއި ޓެބްލެޓް ބެލުމުގައި އަދި އެނޫންވެސް ކަންކަމުގައި ވަގުތު ހޭދަކުރާ ކުދިންނަށް އެހެން ކަމަކާއިމެދު ވިސްނުމުގެ ފުރުސަތު ލިބިގެންދާނެއެވެ. ކުދިން ބައެއްފަހަރަށް ބަލާ ޑޮކިއުމެންޓްރީ ފަދަ މައުލޫމާތު ލިބޭ ވީޑިއޯތަކާއި މެދުވެސް އިތުރަށް ވިސްނަން ފުރުސަތު ލިބެއެވެ. އަބަދު މީހުންގެ ތެރޭގައި އުޅޭ ކުދިންނަށް ހަމަހިމޭން ވަގުތުކޮޅު ލިބުމުން އެކުދިންގެ ކިބައިގައި ހުންނަ އުފެއްދުންތެރިކަން ފެންނާނެއެވެ. އެއީ އެވަގުތުކޮޅަށްފަހު އެކުދިންގެ ވިސްނުމަށް އަންނަ ކަންކަން ބައެއްފަހަކަށް އަމަލީ ސިފަ ގެނައުމަށް ނުވަތަ އެކުދިންގެ ކްރިއޭޓިވިޓީ ދެއްކުމަށް މަސައްކަތް ކުރާނެތީއެވެ.
ހަމަހިމޭން ވަގުތުކޮޅުގެ ސަބަބުން ކުދިންގެ އަމިއްލަ ނަފްސަށް އިތުބާރުކުރަން ދަސްވެ އެކަނިވެސް ވަގުތު ހޭދަކުރެވޭނެކަން ޔަގީންވެއެވެ. ދުވަހުގެ ބިޒީ ޝެޑިއުލުގައި ދިމާވާ ކަންކަމާއި މެދު ރުޅިގަދަވުމުގެ ބަދަލުގައި މަޑުމައިތިރިވެ ހިތްހަމަޖައްސާލުމަށް ފުރުސަތު ލިބެއެވެ. މިއީ ކުދިންގެ ނަފްސާނީ ދުޅަހެޔޮކަމަށްވެސް ފައިދާހުރި ކަމެކެވެ.
