2040 ވަނަ އަހަރު އަންނަ އިރު ދިވެހިރާއްޖެ އަކީ ތަރައްޤީވެފައިވާ ޤައުމެއްކަމުގައި ހެދުމަށް ހިފާފައިވާ އަމާޒަށް ވާޞިލުވެވޭނީ، ދިވެހި ހުރިހާ ރައްޔިތުން، އެއް ވިސްނުމެއްގައި އެކަތިގަނޑެއްގެ ގޮތުގައި މަސައްކަތްކޮށްގެން ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ވިދާޅުވެފައެވެ. ރައީސް މިގޮތަށް ވިދާޅުވީ، ނ. ހޮޅުދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
2040 ގެ އަމާޒަށް ވާޞިލުވުމަށް ދިވެހި ޤައުމުގައި ހަމަޖެހުން އޮތުމުގެ މުހިންމުކަމުގެ މައްޗަށް އަލިއަޅުއްވާލައްވަމުން، ސިޔާސީ ބަދަލުހިފުމުގެ ރޫޙު މިއަދު ދިވެހި ޤައުމުން ނައްތާލެވިފައިވާކަމަށް ރައީސް ވިދާޅުވިއެވެ. މިދިޔަ ދޮޅު އަހަރު ދުވަހުގެ ތެރޭގައި، މި ސަރުކާރުން ސިޔާސީ ވިސްނުމެއްގައި އެއްވެސް މީހަކާ ދޭތެރޭ ފިޔަވަޅެއް އަޅުއްވާފައި ނުވާނޭ ކަމަށާއި، ވިހަ ސިޔާސީ އޮއިވަރެއްގައި ޤައުމު ޖެއްސުމުގެ އާދަ، މި ސަރުކާރުން ނައްތާލާފައިވާކަމަށް ވިދާޅުވިއެވެ. އަދި ކޮންމެ ސިޔާސީ ވިސްނުމެއްގެ މީހެއް ކަމުގައިވިޔަސް، ކޮންމެ ދިވެހި ރައްޔިތަކީވެސް މުހިންމު ރައްޔިތެއްކަމަށާއި، އެ ބޭފުޅެއްގެ ބަހާއި ޢަމަލާއި ވިސްނުން އެ މަނިކުފާނަށް މުހިންމުކަމުގައި، ރޭގެ ބައްދަލުވުމުގައި ރައީސް ވިދާޅުވިއެވެ.
މި ސަރުކާރުގެ އަމާޒަކީ، ރައްޔިތުންނަށް ބޭނުންވާ ކަންކަން ފުރިހަމަ ކޮށްދެއްވުން ކަމަށާއި، މި ކަންކަން ފުރިހަމަ ކޮށްދެއްވުމުގެ ސިޔާސަތު ތަންފީޒުކުރައްވަމުން ގެންދަވަނީ، އިޤްތިޞާދީ ގޮތުން ޤައުމު ވައްޓާލާފައި އޮތް އަނދަވަޅުން ނަގައި، ޤައުމު ދަރަނިވެރި ނުވެ، ފައިސާ ޗާޕު ނުކޮށް ކަމަށް ރައީސް ވިދާޅުވިއެވެ.
އަދި މި ސިޔާސަތުން، ދިވެހިރާއްޖޭގެ ފަޚުރާއި، މިނިވަންކަމާއި، މުސްތަޤިއްލުކަން ދަމަހައްޓައި، އަމިއްލަވަންތަކަމާއެކު ފަރުދީ އަދި ޖަމާޢީ ތަރައްޤީ ގެނެސްދެވޭނޭކަމަށް ވިދާޅުވިއެވެ. ޢުމްރާނީ ތަރައްޤީގެ އިތުރުން، ވިސްނުމާއި އުޅުންތަކާއި ގުޅުންތަކަށް އަންނަންޖެހޭ ތަރައްޤީ ގެނައުމަށް ދެއްވާ އިސްކަމުގެ މައްޗަށްވެސް އަލިއަޅުއްވާލެއްވިއެވެ.
މި ތަރައްޤީ ގެނައުމަށް، ސަރުކާރުން ފަޚުރުވެރިކަމާއެކު ކުރާ މަސައްކަތަށް ރައްޔިތުން ދެއްވާ އެއްބާރުލެއްވުން ވަނީ ފާހަގަކުރައްވާފައެވެ. އަދި ކުރިއަށް އޮތް ދުވަސްތަކުގައި މި މަސައްކަތްތަކުގެ ފޮނިމީރުކަން އިހުސާސްކުރެވެމުންދާނޭ ކަމަށްވެސް ރައީސް ވިދާޅުވިއެވެ.
