ށ. މާއުނގޫދޫ އަންނާރުމާގޭ އުމުރުން 35 އަހަރުގެ މަރްޔަމް ރައުނާ އަކީ 6 އަހަރުގެ ފިރިހެންކުއްޖަކާއި 14 އަހަރުގެ އަންހެންކުއްޖެއްގެ މަންމައެކެވެ. އާދައިގެ ދިރިއުޅުމެއް އުޅެމުން އައި ރައުނާ ކުރިން ދިރިއުޅުނީ ފިރިމީހާގެ ރަށުގައި ގއ. ނިލަންދޫގައެވެ. ބަލިވީ ކުއްލިއަކަށް 2022 ވަނަ އަހަރުގައެވެ.
ރައުނާ މިވަގުތު އޮތީ އައިޖީއެމްއެޗްގެ ކެންސަރު ބަލިމީހުންނަށް ޚާއްސަ ވޯޑުގައި އެޑްމިޓްކޮށްފައެވެ. މިފަހުން އެޑްމިޓް ކުރިތާވެސް މަހެއްހާ ދުވަސް ވެއްޖެކަމަށް ވަނީ ބުނެފައެވެ.
'ޒީޓައިމްސް' އަށް ރައުނާ ވަނީ ވަރަށް ތަފްސީލުކޮށް ހާލަތު ކިޔައިދީފައެވެ.
" ސްކޫލުގައި މުދައްރިސުންގެ ދުވަހާއި ކުޑަކުދިންގެ ދުވަސް ފާހަގަކުރުމަށް ވަންޑޭ ކަޕްއެއް ކުޅުނީ.. އެދުވަހު މެޔަށް އެރި ތަދެއް. ތަދު އެރިގޮތަށް ތަދު ނުފިލި. ރަށު ހޮސްޕިޓަލުން ބުނީ ގޭސް މައްސަލައެއް ކަމަށް. ރަނގަޅު ނުވެގެން ދިޔައީ އަތޮޅު ހޮސްޕިޓަލަށް. ވަރަށް ގިނަ ޓެސްޓު ހަދާފައި ކެންސަރަށް ޝައްކުވާތީ މާލެދާން އެންގީ. މާލެ ދިޔައިރު އެކިކަހަލަ އަލާމާތްތައް ފެންނަން ފަށައިފި. މީހާ ރީނދޫވެ".
ރައުނާ މާލެ އައިސް ދެއްކީ އައިޖީއެމްއެޗްގެ ޑޮކްޓަރުންނަށެވެ. އެމްއާރުއައި އާއި ގުޅުންހުރި އިތުރު ޓެސްޓް ހެދުމުން ޑޮކްޓަރު އެންގީ ވަގުތުން ފުރައިގެން އިންޑިއާއަށް ފަރުވާ އަށް ދިއުމަށެވެ.
" ކިމްސް ހޮސްޕިޓަލުން ކުރީ ވަރަށް ބޮޑު އޮޕަރޭޝަނެއް. 2022 ވަނަ އަހަރު ޑިސެންބަރުމަހު 18 ގަޑިއިރުގެ އޮޕަރޭޝަންކޮށް ލިވާގެ 10 އިންސައްތަ ފިޔަވައި ބާކީ ނެގީ. ކެންސަރަށް ޕޮޒިޓިވްވިއަސް ސިއްހަތު ތަންނުދޭތީ އެއިރު ކެންސަރަށް ފަރުވާ ނުދެވި ދުވަސްތައް ހޭދަވި. އައިސީޔޫ އަދި ވެންޓިލޭޓަރ ގައިވެސް ފަރުވާދިން. ވޯޑަށް ގެންދިއުމަށްފަހުވެސް ފަރުވާ ނުކުރެވި ގިނަ ދުވަސްތައް ހޭދަވި. 6 މަސްދުވަހުގެ ކީމޯތެރަޕީ ނަގާފައި 28 ރޭޑިއޭޝަން އެއިރުދިން. 1 އަހަރުވަރު ހޭދަވި އިންޑިއާގައި ފަރުވާއަށް" ރައުނާ ހިތްދަތިކަމާއެކު ކިޔައިދިނެވެ.
6 މަސްދުވަފަހުން ފަރުވާއަށް އިންޑިއާއަށް ދިއުމަށް ރައުނާ އެނބުރި އައީ ރާއްޖެއަށެވެ. އެކަމަކު ކަންތައް ދިމާވީ އުންމީދު ކުރިގޮތަކަށް ނޫނެވެ. ފަހުން ފަރުވާއަށް ދިޔައިރު ހާލަތު ވަނީ ގޯސްވެފައެވެ.
" ދިޔައިރު އަނެއްކާ އުކުޅުވަޅުގައި ހުރީ އެއްޗެއް އުފެދިފައި. އެއަށް ރޭޑިއޭޝަން ދިނުމަށްފަހު އޭގެފަހުން ފައި ހުންނަނީ ކޮރުވެފަ. ރޭޑިއޭޝަނާއި ކީމޯ ނަގާފައި ރާއްޖެ އައިސް އަނެއްކާވެސް 3 މަސްފަހުން ކޮޗިންއަށް ދިޔައީ. އުނަގަނޑުގެ ފަހަތު ކަށިގަނޑުގައި ހުއްޓާ އަނެއްކާ ފެނުނީ އިތުރު އެއްޗެއް އުފެދިފައި ހުއްޓާ. ކަށީގައި ފެތުރެމުން އަންނަނީ.. ނުވެސް ހިނގޭ. ދެފައިވެސް ވަރަށް އުދަގުލުން ހަރަކާތް ކުރަނީ.. އޮށޯވެގެން އޮންނަންޏާ އޮންނަންޖެހެނީ ފައިތިލަ ޖައްސައިގެން މައްޗަށް ކަކޫ ހިއްލައިގެން.. ސީދާކުރަން އުނދަގޫ. ބަންޑުން ނުއޮށޯވެވޭ. އަރިއަކަށް ނުޖެހެވޭ". ރައުނާގެ ހާލަތު ކިޔައިދިނެވެ.
ދެފައި ވަރަށް ދުރުގައި ބަހައްޓައިގެން ވަރަށް އުދަގުލުން މީހެއްގެ އެހީގައި ރައުނާއަށް ފިޔަވަޅު އެޅޭއިރު ތަހައްމަލު ކުރަމުންދަނީ އުދަގޫ ހާލަތެކެވެ. އެއްފަޅި އައްސިވެ ބާރުދޫވެފައި ހުންނަކަމަށް ވަނީ ބުނެފައެވެ. ކެންސަރަށް ފަރުވާ ހޯދާތާ 4 އަހަރު ވިއަސް ރައުނާގެ އުންމީދަކީ ހާލަތު ރަނގަޅުވުމެވެ. ދެކުދިންނާއި އާއިލާއާއެކު އުފާވެރި ވަގުތުކޮޅެއް ހޭދަކޮށްލުމުގެ ފުރުސަތެއް ލިބޭތޯ ހިތާއިހިތާއި ދުޢާކޮށްލެވެއެވެ. ދެކުދިން ތިބީ ކުދިންގެ ބައްޕައާއެކު ރަށުގައެވެ. ރައުނާ ކައިރީގައި އެހީތެރިވާން ހުރީ ދައްތައެކެވެ. މަންމަ ނިޔާވީ އުމުރުން 2 އަހަރުގައެވެ. ބައްޕަ ނިޔާވީ ރައުނާ ކެންސަރަށް ފަރުވާ ހޯދަން އިންޑިއާގައި ހުއްޓާ ކުއްލިއަކަށެވެ.
" ކަށީގައި ކެންސަރު ފެތުރޭތީ ދާން ޖެހެނީ އިންޑިއާއަށް. އޮގަސްޓުގައި އަންނަން ބުނެފަވަނީ ޕެޓްސްކޭން ހެދުމަށް އިންޑިއާގެ ހޮސްޕިޓަލުން. އޮޕަރޭޝަން ނުކުރެވޭނެތީ.. ކީމޯ އަދި ބޭހުންވެސް ނައްތާނުލެވޭނެތީ.. އަސްލު ލިބެންޖެހޭ ފަރުވާ ލިބެނީ އިންޑިއާއިން. އާސަންދަ ލިބޭނެ ކަމަށް ޑޮކްޓަރު ބުނަނީ އައިޖީއެމްއެޗްއިން ދޫކުރާއިރު". ރައުނާ ކިޔައިދިނެވެ.
ރައުނާގެ ފަރުވާއަށް ގިނަދުވަސްތަކެއް ހޭދަވަމުން އަންނައިރު ފިރިމީހާ އާއި އާއިލާއިން ދެމުންދާ އެހީތެރިކަމަށް ވަނީ ޝުކުރު އަދާކޮށްފައެވެ.
ރައުނާގެ ފަރުވާއަށް އިންޑިއާގައި ހޭދަވާނެ މުއްދަތެއްވެސް ނޭނގެއެވެ. ފަރުވާ ފުރިހަމަކުރުމަށް އިންޑިއާގައި ހުރުމަށް ރައުނާ އެދެނީ އާންމުން އެހީތެރިވެދިނުމަށެވެ.
..................................
ނޯޓް: މިއީ ޒީޓައިމްސްއިން ގެނެސްދޭ މިފަދަ އެހީގެ 53 ވަނަ ރިޕޯޓެވެ. އިންސާނިއްޔަތަށްޓަކައި ކުރާ މިމަސައްކަތުގައި ކިޔުންތެރިން ދެއްވާ އެއްބާރުލުމަށް ޝުކުރު އަދާކުރަމެވެ. މިގޮތަށް ލިބޭ އެހީ ޖަމާވަނީ ބަލިމީހާގެ އެކައުންޓަށެވެ. މި ޢާއިލާ އަށް އެކަށީގެންވާ މިންވަރަށް އެހީ ލިބިފައިވާތީ، މިރިޕޯޓުގައި ކުރިން ހިމަނަައިފައިވާ އެކައުންޓުު ނަންބަރު ވާނީ އުނިކޮށްފައެވެ. ޝުކުރިއްޔާ!
